Martxan dago 'Herria garbi egotea zure ardura ere bada' kanpaina
Kanpainak eguneroko keinu txikietan jarriko du arreta: "Herritar bakoitzaren ekintza txikiek eragin handia daukate guztion artean partekatzen ditugun espazioen kalitatean".
Kanpainarako erabili duten irudietako bat. Irudia: Lekeitioko Udala Garbitasuna ez da udalaren ardura bakarrik; herritar bakoitzaren eguneroko jokabideek ere eragin zuzena daukate herriaren egoeran. Ideia horretatik abiatuta, Lekeitioko Udalak Herria garbi egotea zure ardura ere bada sentsibilizazio kanpaina abiatu du.
Kanpainaren helburua da garbitasunaren inguruko ikuspegia aldatzea. “Askotan pentsatzen dugu herria garbi mantentzeko irtenbidea garbiketa gehiago egitea dela. Baina benetako erronka bestelakoa da: garbitu beharra gutxitzea, hau da, zabor gutxiago sortzea eta espazio publikoak ez zikintzea”, adierazi du udalak ohar bidez.
Udalak gogorarazi nahi du kaleak eta gainerako espazio publikoak garbitzea ezinbestekoa dela, baina garbiketa lanek ere baliabideak kontsumitzen dituztela. “Garbitzeko ura, energia, erregaia eta garbiketa produktuak erabiltzen dira, eta horrek guztiak ingurumen inpaktua sortzen du. Horregatik, aukera jasangarriena ez da gehiago garbitzea, gutxiago zikintzea baizik”.
Kanpainak eguneroko keinu txikietan jarriko du arreta: zaborra edukiontzira botatzea, zigarrokinak lurrean ez uztea, hondartza eta portura hondakinik ez botatzea, txakurren kakak batzea edo jaietan sortutako hondakinak behar bezala kudeatzea. “Herritar bakoitzaren ekintza txikiek eragin handia daukate guztion artean partekatzen ditugun espazioen kalitatean”.
Horretarako, Lekeitioko Udalak komiki estiloko irudiak eta mezu zuzenak erabiliko ditu kaleetan eta udalaren komunikazio kanaletan. Lekeitioko Udalak herritar guztiei dei egin die kanpainagaz bat egin eta herriaren zaintzan parte hartzera.
