"Giro ederrean" ospatu dituzte Aulestiko Murla auzoko jaiak
Jai giro ederrean ospatu dituzte aulestiarrek Murlako jaiak. Egun guztiko egitarauaz gozatzeko aukera izan zuten zapatuan, txapelketaz beteta.
Murla auzoan jaiak ospatu dituzte. Aintzane Arrieta. Abuztuari agur esatera datoz urtero Aulestiko Murla auzoko jaiak, eta aurten ere, “giro ederrean” eman diote amaiera auzotarrek udako oporraldiari. Zapatuan [abuztuak 29] egun guztiko egitarauagaz gozatzeko aukera izan zuten, eta txapelketaz txapelketa ibili ziren goizetik arratsaldera arte. “Egun guztian sekulako giroa egon zen auzoan”, azaldu dute antolatzaileek.
Tradizioagaz jarraituz, mezagaz eman zioten hasiera egunari auzoan, eta goizean motor eta kotxe klasikoen erakusketa ikusiko aukera egon zen. Ondoren, urteroko duatloia lehiatu zuten. Sara A. izan zen lehenengoa emakumeetan, eta Mitxel Z. gizonezkoetan. Duatloiaz gain, txinga jaurtiketa eta mus txapelketa ere lehiatu zuten. Txinga jaurtiketan Sara A. izan zen irabazlea, Onintza G. gelditu zen bigarren postuan, eta Amaiur G. hirugarrenean. Mus txapelketan berriz, Bittor-Iñaki bikoteak eskuratu zuen lehen saria.
18:00etan txikienen txanda izan zen, beraientzako jolasak egon baitziren. Ondoren, 20:30ean pintxo potean ibili ziren bertaratu zirenak, eta ordu berean, Eingo taldea igo zen oholtzara, auzoa dantzan jartzeko. Amaitzeko, 22:30ean, DJ Arene arduratu zen musika jartzeaz.
