Sanantolin "euskaldun, ez baztertzaile eta askeak" aldarrikatu ditu Lekeitioko Mugimendu Feministak
Jai giroa aldarrikapenez betetzeko deia egiteagaz batera, emakumeak, genero disidenteak eta heteronormatik kanpo bizi diren gorputzak "jaien erdigunera eroan eta dagokien tokia hartzera" gonbidatu dituzte. Iazko bide beretik, aurten ere Arreta Feministako Gunea egongo da turismo bulegoan.
Lekeitioko Mugimendu Feministaren atzoko [abuztuak 31] manifestazioa.Lekeitioko Mugimendu Feminista Lekeitioko San Antolin jaiak hastear daude, eta urteroko legez, Lekeitioko Mugimendu Feministak eraso matxisten kontrako manifa egin zuen atzo [abuztuak 31], antolakuntza feministaren beharra aldarrikatuz.
Sanantolinak urteko martxari egiten dieten eten “alai eta kolektiboa” diren arren, argi adierazi dute jai “euskaldun, ez baztertzaile eta askeak” desio dituztela: “Orain artekoak erakutsi du jaiak ondo pasa eta barre egiteagaz lotzen ditugun arren, sarri, negar, ikara, haserre eta umiliazio ere bihurtzen zaizkigula”. Izan ere, jaietan “dena barkatu, dena onartu eta dena libre denaren ideia zabal” dabilela salatu dute. Hala, jaiak lotsak alde batera uzteko une egokia direla uste duten arren, “lotsagarriak diren eta lotsarik sortzen ez duten beste portaera batzuk” salatu nahi izan dituzte, esaterako, eraso matxistak, LGTBIQfoboak eta arrazistak.
Halaber, erasoei aurre egiteko borroka feministaren beharra aldarrikatu nahi izan dute: “Mugimendu feminista eta bere ekarpenak kriminalizatuak izan diren urte honetan, tartean erasoen kontrako protokoloak eurak, borroka feministaren beharra aldarrikatu nahi dugu. Funtsezko, eta tamalez, premiazko ekarpena egiten dugu. Beraz, hemen jarraituko dugu, etenik barik, heteropatriarkatu kapitalista arrazistaren kontra jo eta ke lanean”. Horretarako, jai giroa aldarrikapenez betetzeko deia egiteagaz batera, emakumeak, genero disidenteak eta heteronormatik kanpo bizi diren gorputzak “jaien erdigunera eroan eta dagokien tokia hartzera” gonbidatu dituzte.
Era berean, iaz udalarekin batera martxan jarri zuten protokoloa aurten ere martxan egongo dela gogorarazi dute: “Txosnaguneak eraso matxistak kudeatzeko lanetan daukan eskarmentuari tiraka, iaz Mugimendu Feministaren ekimenez udalarekin elkarlanean aritu ginen, eta emaitza eraso matxisten kontrako protokoloa herri guztira zabaltzea izan da”. Hala, aurten ere, Arreta Feministarako Gunea egongo da martxan turismo bulegoan (Santa Elena Etorbidea, 2): “Erasoak artatu eta salatzeko gunea zabalduko da Gaubegi elkarte profesionalaren eskutik”. Gunea martxan egongo da irailaren 1ean, 3an eta 4an 22:00etatik 06:00etara eta irailaren 5ean, 12:00etatik 06:00etara; gainerako egunetan txosnagunea izango da erreferentzia nagusia. 24 orduz martxan egongo da, ostera, 684 80 20 53 telefono zenbakia.
Arreta Feministarako Gunea
- Irailaren 1, 3 eta 4an: 22:00etatik 06:00etara.
- Irailaren 5ean: 12:00etatik 06:00etara.
- Gainerako egunetarako erreferentziazko gunea: Txosnagunea.
- 24 orduz martxan: 684 80 20 53 telefono zenbakia.
Lekeitioko Mugimendu Feministaren oharra, osorik
Badatoz Sanantolinak eta, zelan ez, pozik gagoz. Urteko martxiari egiten dotsagun eten alai eta kolektiboa da. Adin, jatorri, sexualitate, genero identitate, arraza, hizkuntza eta bizi-baldintza desberdinetako lekitxarrok bat egiten dogu. Ganera, geure buruari dantzatzeko, kantatzeko eta mozorrotzeko tartea eskaintzen dotsagu aste honetan. Lekitxo eta Sanantolin euskaldun, ez baztertzaile eta askeak desio doguz Lekitxoko Feministok, be bai. Orain artekoak, barriz, erakutsi dau jaiak ondo pasa eta barre egitiagaz lotzen doguzen arren, sarri, negar, ikara, hasarre eta umiliaziño be bihurtzen jakuzela.
Jaietan dana parkatu, dana onartu eta dana libre daren ideia zabal dabil. Galdu beharreko lotsak galtzeko aukera ona dalakuan gaoz geu be, baina badagoz lotsagarriak dirazen, eta lotsarik sortzen ez daben beste portaera batzuk be bai: eraso matxistak, LGTBIQfoboak eta arrazistak, esate baterako.
Gizonen munduko futbol txapelketari lotutako estadistiketan atzera be ikusi dan moduan, lehia edo ospakizun zehatz batzuk indarkeria matxista biderkatzeko testuinguru bihurtzen dira. Sanantolinak holako gertaera bat izatia ala ez, danon esku dago. Izan be, jaiak, indarkeria matxista bizitzen dagozen askorentzako, ez dira plazarik ederrena: urte osuan ez koinzidituteko ahalegina egin dogun gizon hori parez pare topatia errezagoa dalako. Geu jazartzen egon dan hori herri bazkariko oilarra edo antzar-harrapatzaile hauspotua zelan bihurtuten dogun ikustia tokaten jakulako. Matxismua ezkutatia errezago egiten dalako alkohola eta beste drogen atzian. Eta, betiko lez, geugana datorrelako bueltan mutil eta gizonen frustrazinoia, hasarria eta ezina biolentzi bihurtuta.
Dana libre dan horretan, neska gaztiak batez be makina bat indarkeri bizi behar izaten doguz jai eremuan: popia ikutu; tabernako komunian geugaz sartu; atetara arte segidu; 50 dei egin; bideoz graba; geure argazkiak zabaldu, mensaje bidez akosa; dantzan gagozela begirada lizunak bota; horman kontra ipini; traguak gonbidatu mozkortzeko asmoz; “potobero” eta bestelako burlak egin; parkian edo hondartzan zirriak egiten gagozela nahi ez dogun toki, modu edo intentsitatera ailagarazi… eta zemat bidar geuk be tabernatik alde egin beharra sentidu dogun edo etxera eskapo egin dogun “babosoa” bat ez aguantatiarren. Zorionez, azkan urtietan autodefentsa feminista bidez, eurak dira jai girua iztera derrigortuta ikusten dirazenak, segi daigun bide horretan.
Asko diraz eraso matxista motak, eta asko diraz hori babesteko moduak: esajeraten gagozela esan, asma egin dogula, nahastata gabizela, mutilen asmua ez zala hori, geuk be nahi gendula. Edo umore matxistadun txistiari barre egin, gusto bako broma matxistari txalo egin, gangarra ataraten daben mutilak hauspotu. Biolentzia normalizatzeko keinuak dira danak. Nahita eta nahibako konplize lanak.
Askotan gogorrago egiten da bigarren eraso hori: lagun, kide, familiarteko edo herritarren isiltasuna; ekintza eza edo beste aldera begiratze hori. Danok ezagutzen doguz emakume erasotuak, baina inork ez dau ezagutzen gizon erasotzailerik. Zelan izan leike hori, ba?
Hori dala eta, txosnaguniak eraso matxistak kudeatzeko lanetan daben eskarmentuari tiraka, joan dan urtian Mugimendu Feministaren ekimenez udalagaz elkarlanian aritu ginian, eta emaitza eraso matxisten kontrako protokolua herri guztira zabaltzia izan da. Horregaitxik, aurten be turismo buleguan(Santa Elena etorb. 2) erasuak artatu eta salatzeko gunia zabalduko da Gaubegi elkarte profesionalaren eskutik: irailaren 1ian, 3an eta 4an gabeko 10etatik goizaldeko 6etara. Eta Antzar egunian goizeko 12etatik goizaldeko 6rak arte. Gainerako egunetan txosnagunia izango da erreferentzia nagusia, baina baita eguneko 24 ordutan martxan egongo dan telefono zerbitzua: 684 80 20 53.
Ezin esan barik itxi, jai eredu feministagoak eta jai programa inklusiboagoak eraikitzeko bidia agortuezinezkoa dala, eta, horretan be, lanian jarraitzeko eskuak bihar dizela. Horregaz batera, borroka feministaren beharra aldarrikatu nahi dogu. Batez be, mugimendu feminista eta bere ekarpenak kriminalizatuak izan dizen urte honetan, tartian erasoen kontrako protokoloak eurak. Funtsezko, eta tamalez, premiazko ekarpena egiten dogu. Beraz, hamen segiko dogu, etenik barik, heteropatriarkatu kapitalista arrazistaren kontra jo eta ke lanian. Gure ustez, jai girua aldarrikapen hori zabaltzeko lekua be bada, lelo, abesti edo ikurren bidez. Horregaz batera, emakumeak eta genero disidenteak eta heteronormatik kanpo bizi garen gorputzak jaien erdigunera eroan eta dagokigun tokia hartzera gonbidatu nahi doguz.
SANANTOLINETAN BE, ANTOLAKUNTZA FEMINISTA!
