Udal brigadak "dagozkion ardurak bere gain hartzeko" eskatu dio Markina-Xemeingo Udalari
"Kualifikazio maila altuagoko lanak" egiten aritu direla adierazi eta euren aurkako "beste eraso bat" jasan dutela salatu dute langileek. Hala, Markina-Xemeingo brigadako beharginak astelehenean hasi ziren udaletxe aurrean elkarteratzeak egiten.
Udal brigadako langileak, atzo, udaletxe aurreko elkarteratzean. Markina-Xemeingo udal brigadako langileek astelehenean hasi zituzten elkarteratze eta aldarrikapenak udaletxearen aurrean. Beharginek euren lana “profesionaltasun eta fundamentu gehiagogaz” egin ahal izateko, “lan antolaketa hobea, agindu eta azalpen argiak eta dagozkion ardurak hartzeko” eskatu dio udalari. Salatu dutenez, “agintaldi aldaketagaz batera gobernu talde berria langileekin batuko zela” adierazi zuen udalak, hala ere, “ez dute brigadarekiko interesik erakutsi guk eurengana jo dugun arte”.
Markina-Xemeingo Udalak “azken urteetan ohikoak izan dituzten hainbat lan egiteari uztea” leporatu die langileei, hala ere, brigadako kideek argi adierazi dute “lan talde osoa ‘peoi arrunt’ kategorian dagoela kontratatuta, eta “kualifikazio maila altuagoko lanak egiten” aritu direla. Gehitu dutenez, udaletxean indarrean dagoen lanpostuen balorazioan zortzitik hiru plaza (elektrizista, igeltseroa eta kamioi idaria) kategoria altuago baten izendatuta daude ofizialki, eta lanpostu horietako langileak jubilatu direnean, “udalak kontratazio berriak ‘peoi arrunt’ kategoriara jaisi” dituela salatu dute. Lanpostuen balorazio hori 2004. urtetik eguneratu barik dagoela azaldu dute langileek, eta egunerako eskatu dutenean, “trabak besterik ez” dituztela jaso.
Brigadak, euren kontratuen harira, “lege-iruzur egoeran” daudela salatu dute: “Irregulartasun egoera honetan hainbat kontratu aldaketa egin dituzte, hauetako batzuk, gizarte-segurantzak onartu ez dituenak”. Hori zuzentzeko, udalak oposaketak ateratzeko konpromisoa hartzen duela adierazi dute, baina “ez duela esandakoa betetzen”. Beharginek adierazi dute udalak “lanorduetatik kanpo lan egiteko akordio bat” adostuta daukala, eta akordio horrek “ez dituela gaur egungo lan hitzarmena eta kontratuan jasotakoak errespetatzen”. Hori konpontzeko, akordio berri bat adosteko saiakera egin zutela adierazi dute langileek, eta hala ere, “udalak uko egin” ziola.
“Borondate falta horren aurrean”, beharginek uztailetik aurrera euren “lan kontratuko kategoriara eta akordiora mugatutako lanak soilik egitea” erabaki zutela azaldu dute. Horri lotuta, brigadakoek bajak ez kubritzea ere leporatu die udalari: “Udako lanaldirako kontratatutako langile bati, iraupen luzeko baja bat ordezkatzeko lan kontratua egingo ziela berretsi zion udalak. Hala ere, azken momentuan, berbatutako kontratu hori ez zela gauzatuko esan zioten”. Gertaera horren ostean, langileek euren aurkako “erasoa” salatu dute: “Brigadako lankideoi leporatu ziguten erabaki horren errua; guk hartutako erabakiaren ondorioz lanik ez dagoela eta langileak soberan gaudela esanez”. Lanik ez dagoela “gezurra” dela azpimarratu dute langileek, eta herriak izan duen hazkundearen ondorioz, “lanak ugaritu” egin direla adierazi eta “lan taldea zortzi langilegaz” mantentzen dela argi utzi dute.
Negoziazioa, kolokan. Egoerari irtenbidea emateko eta “egiten dituzten lan eta funtzioen arabera lanpostuaren deskribapena eta soldata egokitzeko”, udalak “buru-belarri lanean” ari dela adierazi du, baita negozio-mahaia abiatuta dagoela aipatu ere. Udalak, beraz, “langileen lan-baldintza egokiak bermatu eta, aldi berean, diru publikoaren eta udal baliabideen kudeaketa zuzen, arduratsu eta justua egiteko” proposamena aurkeztuta duela adierazi du.
Udalak adierazi duenez, proposamen horrek langileen ordainsari globala 40.674,11 euro gordinera igotzea planteatzen du. Gaur egungo ordainsaria 35.693,84 eurokoa dela adierazi dute, eta horri “hitzarmenetik kanpo jasotzen diren hainbat osagarri” gehitzen zaizkiola. Proposamenak “osagarri horiek nomina ofizialean egituratzea aurreikusten du, lanpostuaren izendapena eta funtzioak egokitu eta ordainsarien egonkortasuna eta, dagokionean, kotizazio oinarriak hobetzeko”. Gainera, urteko lanorduak “nabarmen murriztea” proposatzen dute, “aparteko orduak gutxituz eta urteko atseden egunak 36ra handituta”.
Langileek egin duten bezala, udalak ere aipatu du brigadako kideek zenbait hilabete daramatzatela “urteetan normaltasunez egin dituzten hainbat lan egiteari uko egiten”. Horrek “udal jarduera murriztu” duela argitu du, eta “kanpoko enpresak kontratatu” behar izan dituela funtsezko zerbitzuak bermatzeko, “sortutako gainkostuari aurre eginez”. Udalak, langileek “gezurtzat” jo badute ere, “lan karga jaitsi” dela adierazi du. Horregatik, “ordezkapen kontratuak aldi baterako ez egitea” erabaki du.
Gobernu-taldeak “elkarrizketarako prest” dagoela berretsi du, “akordio gardena, legezkoa eta langileentzat zein herritar guztientzat bidezkoa lortzeko”. Udalak adierazi du bere “lehentasuna” dela “langileen lan-baldintzak hobetzea, zerbitzu publikoen ohiko funtzionamendua bermatzea eta baliabide publikoak modu arduratsu eta bidezkoan kudeatzea”.
