Zabalik dago Ispasterko kirol eskaintzan izena emateko epea
Bost ikastaro egongo dira aukeran, eta irailaren 28an hasi eta maiatzaren 24ra arte egongo dira martxan. Izen ematea irailaren 18ra arte egin ahalko da.
Kirol eskaintza oparoa dakar 2026-2027 ikasturteak Ispasterrera. Irailaren 28ko astean hasi eta 2027ko maiatzaren 24ko asteraino luzatuko dira aurten, eta izen ematea zabalik egongo da irailaren 18ra arte.
Izen ematea Ispasterko Udalaren web orrian (www.ispaster.eus) edo udaletxera joanda egin daiteke. Jakitera eman dutenez, ikastaroen zerrendak irailaren 21eko astean argitaratuko dituzte. Era berean, ikastaroak aurrera atera daitezen gutxienez zortzi pertsonako taldeak izan beharko dira; gehienez, ostera, hamabost pertsonako taldeak izango dira (spinningean, hamabi pertsona). Halaber, talderen batean muga baino pertsona gehiagok izena emango balute, zozketa bidez esleituko lituzkete tokiak; kasu horretan, Ispasterren erroldatuta daudenek lehentasun osoa izango lukete.
Guztira bost izango dira Ispasterko Udalak antolatuta eskainiko diren ikastaroak. 6 euro saioko ordaindu beharko dira zenbait ikastaroren truke. Nagusien luzaketen saioa astelehenetan 17:30ean izango da; GAP martitzen eta eguenetan izango da, 17:50ean eta 18:20an, hurrenez hurren; HIIT (fitness funtzionala) martitzen eta eguenetan izango da, 17:00etan eta 17:30ean; Yoga, ostera, astelehen eta eguaztenetan izango da, 19:00etan. Bestalde, 7 euro saioko ordaindu beharko dira, ostera, spinning ikastaroen truke; astelehen eta eguaztenetan izango da, 19:30ean.
Ordainketak helbideratze bidez egingo dira, eta adierazi dutenez, Ispasterren erroldatutako herritarrek %20ko dirulaguntza jasoko dute udalaren aldetik; horretarako, dagokion inprimakia bete beharko dute. Era berean, familia ugariek %30eko dirulaguntza jasoko dute.
