Korrontzik giro ederra jarri zuen Lekeitioko Ikusgarri Aretoan
200 ikusle batu ziren Korrontzik Etorkizuna Dantza Taldearekin sortutako ikuskizunaz gozatzeko.
Pasaden barikuan [irailak 18] emanaldi berezia eskaini zuen Korrontzi taldeak Lekeitioko Ikusgarri Aretoan eta bertaratu ziren 200 ikusleek musika eta dantzaz gozatu ederra hartu zuten. Musikaz gain, dantzak ere izan baitzuen bere lekua ikuskizunean. Izan ere, aparteko gonbidatuak izan zituen taldeak oholtzan, Etorkizuna Dantza Taldearekin elkarlanean prestatutako emanaldia izan zen.
Zinemazaleen Elkarteak antolatutako emanaldia izan zen, eta David Madarietak primerako giroa egon zela aipatu du: “Euskal folklorez betetako giro eder eta alaia egon zen. Agus Barandiaran betiko moduan bere ehuneko ehun emanaz eta ikusleak animatuz. Hiru abesti jende artean eserita abestu zituen”.
