Bere bidean aurrera darrai, urriaren amaieran hasita eta azaroaren amaiera bitarte, Literatur Amuak kultur zikloak. Asteak joan, asteak etorri, denetariko kultur adierazpide, alor artistiko eta protagonista aritu dira saioetan, eta asteburu honetan, literatur jardunari ez ezik, ilustrazioari tokia egingo diote.
Bihar [azaroak 14, 18:30etik aurrera, Kofradia Zaharrean umeei zuzendutako literatura eta ilustrazioa uztartzen dituen Tete eta Tabi, gure lagun txikiak izeneko lana izango dute hizpide bertaratzen direnek. Ipuin liburuaren aurkezpena egingo dute eta, zelan ez, haren egileak bertan egongo dira: Pilar Arrieta idazle, irakasle eta pikopedagogoa eta Kaiet Bengoetxea marrazkilari eta ilustratzailea. 5 eta 8 urte bitarteko adineko haurrei zuzendutako lan horrek “balioak modu ulergarrian eta era goxo batean lantzea” du helburu. Batik bat, enpatia, inklusioa eta elkarrekiko laguntza jorratu dituzte, ipuina marrazkiekin josita. Ez hori bakarrik: “Elikadura ohiturei edota bulluingari buruz ere dihardugu. Mezu argia eman gura diegu umeei: ezin da beste aldera begira geratu”.
Ibilbide luzea eta oparoa.
Axpi ezizen artistikoz ezaguna den Ainara Azpiazu Aduriz hernaniarra izango da asteburuko bigarren hitzorduaren protagonista. Kofradia Zaharrean ariko da hura ere, domekan, ordu berean hasita. Aduriz euskal ilustratzaile, komikigile eta muralista oparoenetakoa da. Hainbat eta hainbat dira gipuzkoarraren sinadura duten lanak, denetariko arte diziplinetan.
Bai Euskal Herrian, bai nazioartean, hamaikatxo sari eta izendapen jasotakoa da Azpiazu, besteak beste, 2017ko Txaparta Saria, Euskadi Sarietan bost izendapen —bat haur literaturan eta beste lau ilustrazioan—. Ez hori bakarrik: Boloniako (Italia) Feriako Mostra degli Illustratori erakusketaren finalistetako bat izan zen iaz.
