Beloak, maskarilak eta beste
Nork esango zuen, orain denok aurpegia estalita daroagula gure joan-etorrietan, duela ez hainbeste denborako eztabaida eta argudioak antzu geratuko zirenik. Atzean geratzeagatik Athletic-Erreala finala ere iraganean geratu zen etorkizunera begira.
Busturialdean ez zuen indar askorik izan aurpegia estaltzearen inguruko eztabaidak, inork mahai gainean jarri ez zuelako, agian. Baina Euskal Herrian bertan, Iparraldean, Frantziako estatuak ezarritako debekuak izan zuen eragina; hots, hala nahi zuten musulman neskek ezin zuten beloa jantzi eskolara joateko. Austria, Holanda… herrialde ezberdinetan eztabaida bizi-bizia izan zen. Baita gobernatzen gaituen Madrileko eskoletan, non gobernu autonomikoak eskolek beloa debekatzea erabaki dezaketen.
Iazko berriak dira; urte bete ere ez daukate, batzuk iazko udarakoak. Gogoratzen duzue? Oraindik elkar besarkatu, barre egin, muxukatu, lepokoak eman… naturaltasun osoz egiten genuen aurreko udako berriak.
Espainiako estatuko espetxeetan ere eman zen beloaren erabakirik, segurtasun arazoak medio. Badakizue, esate baterako 400 emakumezko espetxe batean batek beloa badarama, gartzeleroentzat identifikazio arazoak sortu ditzake; hau da, errezagoa da Non dago Wally jolasa asmatzea, patio itxi batean preso dauden emakume guztien artean batek beloa eraman eta hori nor den jakitea baino.
Orain, eskoletan klaseak hastekotan dira, batzuk 18an, datorren astelehenean, eta zer eta ikasleak maskarillaz jantzita joan behar dute. Lehen ezinezkoa, onartezina, Europako oinarri santuen kontrako zerbait zen aurpegia estalita eroatea. Eta orain, orain ez, aurpegia maskarila batekin estalita eramatea Europako baloreen erakusgai da.
Kaleetan ere, lehen mozal legearekin segurtasunaren kontrako atentatu larria zena, aurpegia estalita eramatea, hori antisistemek eta antzekoek besterik ez zuten egiten; orain, berriro diot, orain poliziak gu denok aurpegia estalita eroatea bermatuko dute.
Bitartean gure lehendakarietatik batek gu denok txintxo-txintxo uztailean botoa ematera joatea nahi du. Aurpegia estalita osasuna bermatzeko edo estali gabe botaketen garbitasuna bermatzeko, lehendakari, that’s the question.
