Gabonak datoz
Zuetariko nonor oraindik ez bada horretaz jabetu, laster batean Gabonak datoz. Hala adierazi digute herrietako gabon argien pizteak; hala adierazi digu Korte Ingelesak; hala adierazi digu Amazonek; hala adierazi digu Osakidetzak… hala adierazi digu Sarek.
Aste pare bat falta diren arren milioika bonbilatxo ari dira munduan dir-dirka Gabonak datozela iragarriz. «Ei, Gabonak datoz, egin erosketak» ñir-ñir eginez adierazten dute.
Argitxoen ñir-ñirra beste, txanponen klink-klink birtualak entzuten dira, gero eta gehiago da erosketak plastiko bitartez egiten dituztenak: errezago, merkeago, erosoago… bankuentzat diru gehiago…
Ez gaitezen tronpatu, Gabonen erlijio, familia, zoriontasun, ospakizun ikuspegiaren gainetik, Gabonak erosketen egunak dira. Saltzaileek, saltzaile handiek, saltzeko arrazoiak topatzen dituzte beti. Orain Gabonak dira, gero Aste Saindua, Aitaren, Amaren eta Espiritu Saintuaren eguna… Zerbaiten «eguna» behar dute erosketa konpultsiboa egiten dugunean errudun sentimendurik ez izateko.
Gabon egunak datoz eta milaka, milioka pertsona izango dira hara eta hona gabon oporretan, etxekoengatik hurbilago egon guran. Batzuk birtualki egingo dute bidaia, ezintasuna edo beldurra direla medio.
Ez dira egun arruntak. «Gabon espirituaren» kontra daudenek ere ez dituzte normaltzat hartzen egun hauek. Gabonetatik alde egiteko oporretan joaten dira Gabonak ospatzen diren beste toki batzuetara! Nola egingo duzu ihes Gabonetatik ba. Ezinezkoa da, toki guztietan dago.
Gabonak datoz eta ez ei dira Gabon normalak izango aurten ere. Normalak ez izateak ez du zoriontsuak ez izateak esan nahi inolaz ere. Zoriontasuna bakoitzak landu behar bai du, ez dator korte ingeleseko argietan edota Amazon Prime furgonetan sartuta, iragarkiak ikusita hala ematen badu ere.
Aurtengo Gabonak, berriz ere, ez ei dira normalak izango. Baina zera, zer izango dira Gabon normalak etxekoa 30 urtetan preso duenarentzat esate baterako?
Gabonak dira eta neuk neure neurrian ospatuko ditut, baina ez ditzagun gure herriarengatik, gugatik, lau horma artean daudenak ahaztu.
