Valentina, hau ere politika da
Koronabirusak sortu duen larrialdi egoera honen aurrean, hainbatetan telebistan hau ez dela politika entzun dut, Espainiako estatuko presidenteari esate baterako. Mugek eta banderek ez dutela axola halako pandemia baten aurrean.
Hala beharko luke bai, baina hara zer eta egin dituen gauzetatik bat larrialdi egoera Espainia osorako aldarrikatu da; jakina, larrialdia Espainia osoan delako eta toki guztietan berdin-berdin, ez dago mugarik, ez dago banderarik. Hala esan dute gobernuan bere bazkide diren beste horiek ere, hemen ez dago lurralde ezberdintasunik, klase ezberdintasunak baizik, pobreek hiltzeko aukera gehiago dute aberatsekin konparatuz.
Ez dago ez mugarik, ez banderarik, eta hartu dituen neurrietatik bat mugak ixtea izan da; existitzen ez ei diren muga horiek itxi eta Araba, Katalunia edota hori eskatu duen Murtziako muga ezin da itxi, baina Gipuzkoa eta Lapurdiren artekoa bai.
Ai, Valentina, egun batez zu izan zinen espainiarren heroia. Zuk garbitu zenituen Espainiako Kongresuko atril eta mikrofonoa. Zuk zaindu zenuen gure ordezkarien osasuna. Ai ez, gure ordezkariak ez ziren han izan.
Tira, Valentina, zuk, zeure trapu, garbikari eta fris-frisarekin armaturik –orain gerra hizkuntzan modan ei dago– Espainiako estatuko etxe garrantzitsuena salbatu zenuen, guztion etxea omen dena, demokraziaren aterbe nagusia.
Ai, Valentina, zuk bai, zuk. Telediario, teleberri eta abar guztietan zure irudia ikusita eta jaso zenituen txaloak entzunez, zera otu zitzaidan, zenbat Valentina ez ete diren munduan egongo halako lanetan egunero fin-fin eta sarri miseriazko soldatak jaso, kontratu barik, inolako errekonozimendu barik.
Seguruenik toki askotatik birusa kentzeko beste Valentina egongo dira munduan, Valentinoren bat ere. Ziur Loiuko aireportukoan badagoela Valentina bat. Baita tren geltokietan. Eta beste hainbeste tokitan, ziur.
Baina, Valentina, hau ere politika da. Hitzez ez bada, ekintzez. Zuen lana gutxietsita, hor jarri dute espainiako indar armatua eta Ertzaintza, oraingoan trapu, garbikari eta fris-frisez armatua, jo eta fuego garbiketa lanak egiten.
Zuen ordez, Valentina, telebistetan garbiketa lanetan agertzea ez dela politika diote. Bai zera!
