Zenbat gehiago?
Duela 24 urte agerikoa izan zen (eta gaur gaurkoz, da) onarpenaren berrespena emateko. Pasaden maiatzaren 8an, Iratxe Sorzabalek 2001eko martxoan jasandako torturak onartu zituen Auzitegi Nazionalak, are gehiago, absolbitu egin zuen. Historiko gisa definitu da epaiketa (beti bezala, beste hainbaten isiltasunen artean). 1995ean Alacanteko aireportuko zaborrontzi batean lehergailu bat uztea egotzita, 2001eko martxoaren 30ean atxilotua izan zen. Bost egunez inkomunikatuta eta elektrodoekin bortizki torturatua izan ondoren, Espainiako Auzitegi Nazionalak bere aurka zuen froga bakarra berretsi zuen Iratxe espetxeratzeko, besteak beste, inkomunikazioaren epealdi horretan ETAko zuzendaritzari idatzitako autoinkulpazioaren gutuna.
Asko dira Euskal Herrian Guardia Zibilak edo bestelako talde parapolizialek burututako torturen kasuak. Urte luzez hamaika eragile desberdinek salatu dituzte Euskal Herriko hainbat pertsonak atxiloaldietan jasandako tratu gizagabeak. Besteak beste, Eusko Jaurlaritzak eta Nafarroako Gobernuak aurkeztutako txostenaren arabera, 5394 (jakina gehiago izan direla) pertsona torturatuak izan dira. Halaber, bada faktore bat Euskal Herriko torturatuen kasuan azpimarratu behar dena: emakume militante iraultzaileek jasandako tortura sexistak. Guardia Zibilaren eskutik biluztuak, umiliatuak, jipoituak, eta are gehiago, ikutuak izatea. Iratxe Sorzabalek berak azaldu zuen epaitegian Guardia Zibilaren aurrean bera ez zela militante bat, baizik eta emagaldu puta bat.
Ukaezina da Espainiar Estatuak Euskal Herrian martxan jarritako tortura sistematikoa. Eta horrela definitzen dut, Espainiar Estatuko milaka eragilek horrela babestu dutelako. Hortaz, ez dezagun inoiz ahaztu milaka emakume militante iraultzaile daudela Euskal Herrian, Iratxe Sorzabalek jasandako tortura fisiko eta psikologiko berak jasan dituztenak. Milaka oraindik, onartuak ez direnak. Milaka oraindik, torturaren minaren ondorio psikologiko ihesgabeak bizi dituztenak. Milaka oraindik, haien torturaren aitortzaren zain jarraitzen dutenak. Kasu honetan, 24 urte igaro behar izan dira Iratxe Sorzabalek Auzitegi Nazionaleko epaimahaietan behin eta berriz deklaratutakoari kasu egiteko, eta azkenean, onartzeko. Izan ere, zenbat urte gehiago igaro behar dira Espainiar Estatuak Euskal Herriko torturatuen kasu guztiak aitortzeko?
Dena den, kasu hau garaipen gazi-gozo bat bezalakoa da. Maiatzaren 21ean Auzitegi Nazionalak ebatzitako epaiari helegitea jarri baitio fiskalak. Hamarkada luzez aldarrikatutako egia, aitortza eta erreparazioan mugarri diren urratsak behin eta berriz oztopatzeak, herri honek jasandako minaren erreparazio eza dakar. Horrenbestez, gaur egun euskal gatazka armatua jada existitzen ez den arren, agerikoa da euskal gatazkak bizirik dirauela.
