‘ABCD berri bat’ ipuina aurkeztu dute
Liburutegien Eguna aitzaki, Peru Abarka lehiaketako album barria aurkeztu zuten astelehen iluntzean, udaletxean egindako ekitaldian. Aurtengo saridunek, Yolanda Arrieta idazleak eta Yolanda Mosquera ilustratzaileak, emon zuten ezagutzera aurtengo ipuin irabazlea, bakoitzak dakien erara: albumeko istorioaren atalak irakurri zituen Arrietak eta istorioa irudikatu zuen Mosquerak. Gauza barriak ikasi nahi dituen hegoaldeko nerabe baten istorioa kontatzen du ABCD berri bat ipuinak. Jakiteko gose da, baina bere herrian ez du gose hori asetzeko aukerarik. Orduan, iparraldera etortzeko aukera sortuko zaio, eta aukera horri baietz esango dio. Leku ezagun bat laga eta leku barri batera salto egingo du: iparraldeko aititaren etxera. Gazte etorkina, egoera barrira egokitzen joango da: egun barriaren esnaera, senide barriagaz topo egitea, leihoaz bestaldeko errealitatea eta iraganaren arteko talka, eta azkenik, onarpena. Proposamen poetikoa ABCD berri bat ez da ohiko ipuina. Ohiko istorio bat kontatzeko beste era bat aurkitu nahi izan zuen Yolanda Arrietak, eta halan, era poetikoan, sentiberatasuna, fantasia eta zirrara sortzen dituen ipuina sortu du. «Bi gela ditugu, oroimena eta irudimena, eta bi gela desberdin izan arren, lotuta daude. Hori kontuan hartu dut, kontu normal bat kontatzeko», azaldu zuen Arrietak. Bestalde, ipuina, isil-isilik edo altu, ozenki, irakurtzeko moduan idatzi duela be aitatu zuen Etxebarriko idazleak. Ilustrazioei dagokienez, pertsonaien momentu [...]
Liburutegien Eguna aitzaki, Peru Abarka lehiaketako album barria aurkeztu zuten astelehen iluntzean, udaletxean egindako ekitaldian. Aurtengo saridunek, Yolanda Arrieta idazleak eta Yolanda Mosquera ilustratzaileak, emon zuten ezagutzera aurtengo ipuin irabazlea, bakoitzak dakien erara: albumeko istorioaren atalak irakurri zituen Arrietak eta istorioa irudikatu zuen Mosquerak.
Gauza barriak ikasi nahi dituen hegoaldeko nerabe baten istorioa kontatzen du ABCD berri bat ipuinak. Jakiteko gose da, baina bere herrian ez du gose hori asetzeko aukerarik. Orduan, iparraldera etortzeko aukera sortuko zaio, eta aukera horri baietz esango dio. Leku ezagun bat laga eta leku barri batera salto egingo du: iparraldeko aititaren etxera. Gazte etorkina, egoera barrira egokitzen joango da: egun barriaren esnaera, senide barriagaz topo egitea, leihoaz bestaldeko errealitatea eta iraganaren arteko talka, eta azkenik, onarpena.
Proposamen poetikoa
ABCD berri bat ez da ohiko ipuina. Ohiko istorio bat kontatzeko beste era bat aurkitu nahi izan zuen Yolanda Arrietak, eta halan, era poetikoan, sentiberatasuna, fantasia eta zirrara sortzen dituen ipuina sortu du. «Bi gela ditugu, oroimena eta irudimena, eta bi gela desberdin izan arren, lotuta daude. Hori kontuan hartu dut, kontu normal bat kontatzeko», azaldu zuen Arrietak.
Bestalde, ipuina, isil-isilik edo altu, ozenki, irakurtzeko moduan idatzi duela be aitatu zuen Etxebarriko idazleak.
Ilustrazioei dagokienez, pertsonaien momentu bakoitza atara eta marrazki bidezko kontaketa egin du Mosquerak. «Nire asmoa, irudien bidez, testuari zer edo zer gehiago eskaintzea izan da; ekarpena egitea», zehaztu zuen ilustratzaileak.
Irudiak deszifratu egin behar dira; begiratu eta begiratu, gauza barriak atara ahal izatea izan da-eta Mosqueraren asmoa. «Sentsazioak irudikatzea gaitza da, eta horiek adierazteko istorio paraleloa sortu dut marrazkiekin», azaldu zuen.
Antolatzaileak «pozik»
Album lehiaketaren irabazleez gainera, «poz-pozik» agertu ziren bai eta be herri bibliotekako arduradun Igor Idoeta, Udaleko zinegotzi Josune Baskaran eta Mezulari argitaletxeko arduradun Mari Eli Ituarte. Hirurak goraipatu zuten aurtengo albumaren kalitatea, eta datorren urtean be jarraitzeko apostua egingo dutela jakitera emon zuten.
Peru Abarka album lehiaketaren seigarren urtea izan da aurtengoa, eta idazlanen atalera hemeretzi lan aurkeztu direla azaldu zuen Mari Eli Ituartek. Lutxo Egia, Patziku Perurena eta Ituarte bera izan dira aurten idazlanen ataleko epaimahaia, eta kalitate horretako lanen artean bat aukeratzea erraza izan ez zen arren, ABCD berri bat hasiera-hasieratik nabarmendu zela aitatu zuen Mezulari argitaletxeko arduradunak.
Testua aukeratuta, ilustratzaileen lehiaketa jarri zuten martxan, eta zazpi lan aurkeztu ziren bertara. «Yolanda Mosquerak primeran interpretatu zuen, irudien bitartez, Yolanda Arrietaren testua. Hori dela eta, bere lana saritzea erabaki genuen», zehaztu zuen Ituartek.
Lan bien bategitetik sortu da, azkanean, ABCD berri bat albuma, eta aurkezpenean egon ziren guztiek jaso ahal izan zituzten irabazleek sinatutako lehen aleak ekitaldi amaieran.
