‘Desagertuak’ erakusketa ikusgai dago Zabielen, oroimena azaleratzeko bidean
Gervasio Sanchez (Kordoba, Espainia, 1959) argazki-kazetariaren Desagertuak lana ikusteko aukera dago egunotan Zabiel kultur etxean. Euskal Fondoaren bidez eskuratu du Mutrikuko Udalak eraskusketa herritarrei eskaintzeko aukera. Datorren eguaztenera a...
Gervasio Sanchez (Kordoba, Espainia, 1959) argazki-kazetariaren Desagertuak lana ikusteko aukera dago egunotan Zabiel kultur etxean. Euskal Fondoaren bidez eskuratu du Mutrikuko Udalak eraskusketa herritarrei eskaintzeko aukera. Datorren eguaztenera arte, urriak 17, egongo da erakusketa zabalik, astegunetan 18:00etatik 20:00etara bitartean, eta domeketan 12:00etatik 14:00etara. Dena den, institutuko ikasleei gonbidapena egin die udalak, eta ikusteko interesa balute goizean irekiko lukete aretoa.
Obrak Sanchezen ibilbide zabalaren lan nagusiena azaltzen du. Bere irudiek etorkizunean iragana ez ahazteko baliozko ondarea osatzen dute. 1998 eta 2010 bitartean garatuta, sendotasunez azaleratzen da egitasmoa, memoria, egia eta justizia aldarrikatzeko. Eta falta direnen oroimena babesteko ekimenean, desagertutako senideen erretratuek protagonismo berezia hartzen dute.
Ibilbide profesional luzea
Erakusketa gelan 54,6 x 76 zentimetroko 40 argazki-lan daude ikusgai, bost argazki multzotan banaturik: lehenengo multzoak Atxiloketa Guneak, Memoria eta Objektuak barneratzen ditu; bigarren multzoak Hilobitik Ateratzea; hirugarren multzoak Sotoak eta Identifikatzea; laugarren multzoak Ehorzketa; bosgarren eta azken multzoak Espainia.
Gervasio Sanchezen biografia ere erakusketan bertan egongo da ikusgai. 1998 urteaz geroztik, UNESCOren bakearen berriemaile berezia da.
