Debabarreneko metalgintzako LABek LAN BI enpresaren aurrean elkarretaratzea egingo du bihar
12:00etarako deitu du elkarretaratzea sindikatuak. “ADEGIko partaidea da LAN BI enpresako jabeetako bat, eta beraz, gaur egun Gipuzkoako metalgintzako langileok hitzarmenik gabe egotearen erantzuletako bat ela deritzogu”, adierazi dute sindikatuko kideek.
Gipuzkoako metalgintzako langileok, hitzarmenik gabe gaude 2011ko bukaeraz geroztik. Gipuzkoan 50.000 langile baino gehiago dira, eta Debabarrena eskualdean metalgintza sektoreak duen pisua ukaezina da. Milaka dira sektorean lanean dihardute pertsonak. “ADEGIk Rajoyren Lan Erreforma aplikatu nahi digu langileoi. Euskal Herrian behin baino gehiagotan eman diegu ezezkoa Madriletik inposaturiko erreforma eta murrizketei, baina patronalak ez dio uko egiten erreforma aplikatzeari. Nola nahi dute ekonomia suspertu erreforma atzerakoi hau aplikatuz? Lan erreformak ez die erantzuten Gipuzkoako metalgintzako enpresek dituzten beharrei”.
30 urte baino gehiagoko borrokaren bitartez lorturiko eskubideak ezerezean utzi nahi dituztela adierazi du LABek. “Sindikatuko partaideok etengabeko borrokan dihardugu azken bi urteotan, denon hitzarmena babesteko:manifak, grebak, kontzentrak, kotxe karabanak, kanpaldiak, ekintza ikusgarriak, mobilizazioak enpresetan…”
Egoera hau, dena den, ez da soilik metalgintzako langileon arazoa. “Sektoreak eskualde honetan eta herrialde mailan duen garrrantzi kulitatibo eta kuantitatiboa ikusirik, arazo ekonomiko, sozial eta politiko baten aurrean gaudela esan genezake. Metalgintza sektorean hitzarmenik ez edukitzeak ondorio oso kaltegarriak ditu eskualdeko ehun ekonomikoan”, gehitu dute.
