Ondarroak XVII. Baserri Azoka ospatuko du abuztuaren 2an

Lea-Artibai eta Mutrikuko Hitza

2014/07/23

Azoka Lea-Artibai Landa Garapenerako Alkarteak eta Ondarroako Udalak elkarlanean antolatzen dute. Aurten, azoka abuztuaren 2an egingo da, Itsasaurren. “Uda sasoian Lea-Artibain antolatzen den nekazaritza-elikagaien azoka nagusienetakoa da Ondarroakoa“. Aurten, azokako giroa, beste urteetan legez, “jatorra eta herrikoia” izango dela azpimarratu dute landa garapenetik.

Ordutegiari dagokionez, azoka 10:00etatik 14:30era egongo da zabalik.

Horrela ba, beste behin ere, azokan baserriko produktuak eta nekazaritza-elikagaiak dastatu eta erosteko aukera egongo dela aurreratu dute antolatzaileek. “Horrez gain, txahal errea dastatzeko eta taloak erosteko aukera ere egongo da azokan”. Orokorrean, azokan, Lea-Artibaiko eta oro har, Bizkai osoko hainbat baserritarren produktuak egongo dira. “Kalitate goreneko bertoko produktuak erosteko aukera edukitzeaz gain, ekoizleak aurrez aurre ezagutzeko aukera ere egongo da”, gaineratu dute.

Antolatzaileek herritarrei azokara gerturatzeko deia egin diete: “Animatu eta etorri Ondarroako Baserri Azokara. Eros ditzagun bertoko baserritarren produktuak”.

Guztira 18 salmenta postu egongo dira eta ondoko produktuak egongo dira eskuragai:

Fruitu eta barazkiak
Fruitu eta barazki ekologikoak
Idiazabal gazta.
Ahuntz gazta.
Ogia eta gozoak.
Eztia
Txerrikiak.
Ahatekiak.
Loreak
Txakolina
Sagardoa
Arrain kontserbak
Barazki eta fruitu kontserbak
Eskuz egindako pilotak