San Migel egunak jaia ekarri du Arretxinagara

2017/09/29

Egun handia izan da gaur [irailak 29] Arretxinagan. San Migel eguna ospatu dute goiz, arratsalde eta gaba, giro ezinhobean. Jai izan da, gainera, markina-xemeindar askorentzat, eta Arretxinagako plazara hurreratu dira ekitaldiekin gozatzeko. San Migel egunez ohi den modura, Xemeingo Ezpata Dantza eta ondorengo Aurreskua ikusten egon dira herritar asko eguerdian. Urteroko ohitura bada ere, galdu ezinezko ekitaldia izaten da askorentzat, eta gogoz txalotu dute Zerutxuko dantzariek eskainitako ikuskizuna.

[zuzenean ARGAZKI GALERIA IKUSI]

Mariatxiek luzatu dute eguerdia. Hainbat doinu dantzagarri jo dituzte aulkietan jarrita edo txosnen inguruan zutik emanaldia jarraitzen egon direnen gustua asetzeko. Arratsaldean, berriz, baseliza eta probalekua izan dira bilgune. Iñaki Perurena harrijasotzaileak harrien inguruko azalpenak eman ditu baselizan, jasoaldiak ere tartekatuta. Zubibarriren idien eta Patxua Tabernako zaldiaren arteko norgehiagoka egon da jarraian, probalekuan. Idiak atera dira lehenbizi plazara eta 1.500 kiloko harriagaz 36 untze metro bat eta 60 zentimetro egin dituzte. Zaldiak, berriz, 67 untze 3/4 3 metro eta 80 zentimetro egin ditu 900 kiloko harria batera eta bestera eramanez.

[zuzenean ARGAZKI GALERIA IKUSI]

Idien marka ontzeko 54 untze 2 metro eta 40 zentimetro bete behar zituen zaldiak, eta marka hori hobetzea lortu du erraz. Jaiak hasi besterik ez dira egin. Gaur bezala, egun osoko egitaraua egongo da bihar [irailak 30] eta etzi [urriak 1] ere.

HONEKIN LOTUTA:

San Migel jaiak 2017 (Markina-Xemein, Arretxinaga)

Erlazionatutako edukiaARGAZKI GALERIA: Markina-Xemeingo Arretxinagako San Migel jaiak 2017