Otoiora kronoigoera egingo dute Ispasterren, bigarrengoz
Txirrindularitza eta mendia gustuko dutenek hitzordua daukate Ispasterren, zapatuan [ekainak 9]. Iaz egin zuten lehenengoz proba, eta orduan moduan, ume, gazte zein nagusientzat ibilbideak prestatu dituzte. Hain zuzen, 7-10 urte bitartekoek 1.200 metroko kronoigoera egin dezakete, 11-14 urte bitartekoek 2 kilometrokoa, eta helduek, berriz, 3,4 kilometroko ibilbidea gainditu beharko dute (273 metroko desnibelagaz).
www.kirolprobrak.com webgunean aurrez izena eman daiteke, edo bestela, egunean bertan, 15:30etik 16:00etara ere egin ahalko da. Barikuan [ekainak 8] 09:00etan amaituko da Internet bidezko izen ematea. Ume eta gaztetxoek egunean bertan eman behar dute izena, plazan. Izena ematerakoan federatuek 10 euro ordaindu behar dituzte, eta federatuta ez daudenek, berriz, 12 euro. Ume eta gaztetxoek ez dute ezer ordaindu behar.
17:00etan hasiko da nagusien proba, plazan; ordubete lehenago, 16:00etan izango dute irteera ordua umeek, eta gazteak ordu erdi beranduago aterako dira. Ipargorri Kirol Elkartearen ordezkariek esan dutenez, iazko parte hartze antzekoa espero dute, 50-60 txirrindulari espero dituzte nagusien kronoigoeran.”Esaterako, iazko irabazleak parte hartuko duela esan digu”.
Amaierarako, ume, gazte zein nagusientzat askaria prestatuko dute plazan, eta euria eginez gero, elizpean batuko lirateke. Antolatzaileek jakinarazi dutenez, frontoian dutxatzeko aukera edukiko dute.
Sariak. II. Otoio Igoera Krono-MTB Ispasterko Udala II. Sarian lehenengo bost emakumezko eta gizonezko sailkatuak sarituko dituzte. Irabazleek 50 euro jasoko dituzte, bigarren sailkatuek 40 euro, hirugarrenek 30 euro, laugarrenek 20 euro eta bosgarrenek 10 euro. Umeei eta gaztetxoei dominak emango dizkiete.
