EMEekin programari jarraipena emango dio Azaro Fundazioak
Bigarren programan, berrikuntza gisa, marka pertsonala indartu eta lana bilatzeko orduan erreminta digitalen erabilera landuko dira.
EMEekin programa. Argazkia: Azaro Fundazioa Lehen urtean edukitako arrakasta ikusita otsailean EMEekin programa berri bati hasiera ematea erabaki du Azaro Fundazioak, eta programa berrian izena emateko epea zabaldu dute. EMEekin Azaro Fundazioak Bizkaiko Foru Aldundiaren laguntzaz, eta Leartibai Garapen Agentziarekin eta Lea Artibai Ikastetxearekin elkarlanean martxan jarritako programa da. Lea-Artibai eskualdeko emakume langabetuei zuzenduta dago, eta hauen ekintzailetza eta kalitatezko enplegu egonkorrak bultzatzea ditu helburu.
Otsailaren 7an hasiko den programa berriak 6 hilabeteko iraupena izango du (uztailaren 19ra arte), eta berritasunekin dator. “Besteak beste, egun bogan dauden bi arlo sakonduko dira: norbere marka pertsonala indartzeko teknikak eta lana bilatzeko erraminta digitalen ezagutza”, azaldu dute.
Programa jarraitzeko aurrez aurreko klaseak eta sare bidezkoak uztartuko dituzte, “IKT tresnen erabilera sustatu eta familia bizitzarekin bateragarritasuna errazteko asmoz”. Aurrez aurreko saioak astean bi egunetan izango direla aurreratu dute, 09:45etik 12:45era. Hala ere, parte hartzaileen arabera, egun eta ordutegiak moldatu ditzaketela esan dute.
Parte hartzaileek era askotako moduluak landuko dituztela zehaztu du Azaro Fundazioak: komunikazio gaitasunak, sormena, lidergotza, negozio eredu berriak, berrikuntza… “Horrez gain, coaching eta mindfulness tekniken bitartez bestelako gaitasunak garatzeko aukera ere izango dute parte hartzaileek. Guzti hau, enpresa munduarekin harremana berreskuratu eta egun baloratzen diren konpententziak ezagutzera bideratuta”. Hala, ekintzailetzan eta negozio ideia berrien sorreran eragitea lortu, eta ekonomia zirkularraren esparruan, ekintzailetza berdea sustatu gura dute. Negozio ideia duten emakumeei ideia definitzen eta lantzen lagunduko diete.
Parte-hartzaileak, uneoro, esparru anitzetako profesionalez inguratuta egongo direla jakitera eman dute, eta banakako coaching saioak zein taldekakoak edukiko dituzte. “Lan orientatzaile batek gidatuko ditu programa osoan, eta iazko programan parte hartzaileek oso positiboki baloratu zuten alderdi emozionalaren lanketak ere pixu handia izango du EMEekin-en bigarren programa honetan ere”.
Saio gehienak Markina-Xemeingo Berrikuntza Gunean egingo dituzte. Lea-Artibaiko enpresa ehuna, ekonomia zirkularra eta sormena deritzen atalak Azaro Fundazioko teknikariekin landuko dituzte. Ekintzailetza saioak, ostera, Leartibai Garapen Agentziak gidatuko ditu, eta Leartibai Ikastetxearen esku egongo dira gaitasun pertsonalak, laneratzeko ibilbide pertsonalizatuak, elkarrizketa pertsonalak eta coaching pertsonalizatua deritzan arloak. Bestalde, ZKOMUNIKAZI enpresa adituko kideek erakutsiko dizkiete erraminta digitalak eta marka pertsonala zelan landu, eta norbere diskurtsoaren lanketa AKEN enpresa adituaren ordezkariekin egingo dute.
Antolatzaileek azpimarratu dutenez, EMEekin programan formazio berritzailea eskaintzen dute, “emakumeak ahaldundu eta egungo lan mundurako beharrezkoak diren tresnak bereganatuz laneratzeko unean prest eta konfidantzaz sentitu daitezen”.
Parte hartzeko interesa duten guztiek urtarrilaren 31ra arte edukiko dute bigarren programan izena emateko aukera. Horretarako Azaro Fundaziora deitu behar dute, 94-616 91 72 telefono zenbakira.
TREBAKUNTZA GAIAK:
- Lea-Artibaiko enpresa ehuna (10 ordu)
- Marka pertsonala, erreminta digitalen bidez (5 ordu)
- Ekintzailetza (25 ordu)
- Norbere diskurtsoaren lanketa (10 ordu)
- Sormena (5 ordu)
- Ekonomia zirkularra (15 ordu)
- Gaitasun pertsonalen garapena (35 ordu)
- Coaching saio indibidualak (15 ordu)
- Ibilbide pertsonalizatuen diseinua eta lan-orientazioa (10 ordu)
