Lekeitio 'herri lagunkoia' izateko ekintza plana osatzen hasiko dira
Ekintza plana egiteko prozesua lau saiotan banatuko da, eta bakoitzean bi arlori buruz hitz egingo dute. Lehen saioa eguenean egingo dute.
Lekeitio Herri Lagunkoia prozesuaren talde eragilearen aurkezpena Barandiaran aretoan. Udalerria “herri adeitsua” bihurtzeko lanean jarraitzen dute Lekeition. 2018ko otsailean eta martxoan Lekeitioko Lagunkoitasun diagnostikoa egiteko saioak egin zituzten, eta parte-hartu zutenen ikuspuntuak eta iritziak jaso zituzten. Ondoren, diagnostikoa osatzeko inkestak egin zituzten, guztira 356 inkesta jasoz. Eta, orain, ekintza plana prestatzen hasiko dira, diagnostikoan agertutako arazoei irtenbidea bilatuz.
Horretarako, beste behin ere, herritarrengana jo dute euren parte hartzea bilatuz. “Ekintza plana egiteko prozesua lau saiotan banatuko da, eta bakoitzean bi arlori buruz hitz egingo da”, azaldu dute udal arduradunek. Lehenengo saioa eguenean [urtarrilak 17] egingo da. Bertan, aire zabaleko guneez eta eraikinez eta garraioari buruz hitz egingo dute parte hartzaileek.
Saio guztiak 17:30tik 19:00etara egingo dira Barandiaran aretoan, plazatik sartuta. Parte hartzeko, baina, aurretiaz izena eman behar da Lekeitioko Udaleko Gizarte Zerbitzuetan, agurtzane-ongintza@lekeitio.eus helbidera idatzita edo 94-603 41 00 telefono zenbakira deituta.
Hurrengo saioetako datak eta gaiak ere aurreratu dituzte:
- Urtarrilak 24. Landuko diren gaiak: Etxebizitza, sareak eta gizarte laguntza.
- Urtarrilak 31. Landuko diren gaiak: Enplegua eta partaidetza, errespetua eta gizarteratzea.
- Otsailak 7. Landuko diren gaiak: Komunikazioa eta informazioa eta gizarte eta osasun zerbitzuak.
