Premiazkoa duten puntuaren bila aterako dira Aretxabaleta eta Laso, Mungian
22:00etan hasiko da pilota ikuskizuna eta eskuz binakakoaren aurretik, Binakako Promozio Txapelketaren jokalarien txanda izango da
Bi bikoteak pilota aukeraketaren ostean.
Argazkia: Asegarce. Laso-Aretxabaleta eta Ezkurdia-Galarza. Eskuz Binakako Txapelketan, lehia garrantzitsua hartuko du Mungiako pilotalekuak bariku gauean (urtarrilak 18).
22:00etan hasiko da pilota ikuskizuna (Euskal Telebistak zuzenean emango du) eta eskuz binakakoaren aurretik, Binakako Promozio Txapelketaren jokalarien txanda izango da. Elordi-O. Etxebarria eta Ugalde-Jaunarena bikoteak ariko dira zein baino zein gehiago.
Lasok Urrutikoetxea ordezkatuko du; zaratamoztarrak ezkerreko eskuan min hartu eta ez baitago jokatzeko moduan. Markina-xemeindarrak, berriz, eskumako eskua hobeto daukala frogatu zuen aurreko barikuan, Bilbon (Olaizola IIaren eta Albisuren kontra 22-19 galdu zuten).
Lehia biziko hitzordu honetan, jendez lepo egongo da frontoia; sarrerak agortuta daude. Urrutikoetxeak eta Aretxabaletak eta Ezkurdiak eta Galarzak bina puntu dituzte, eta orain arte jokatutako zortzi partiduetatik bina irabazi dituzte. Hiru puntugaz daude Bengoetxea-Imaz eta Altuna-Martija bikoteak.
Sailkapenaren goikaldean, Elezkanok eta Rezustak lidergoari eusten diote, sei puntugaz. Aurreko astean Bilbon irabazi eta gero, Olaizolak eta Albisuk ere sei puntu dituzte, eta bost puntugaz daude Irribarria-Zabaleta eta Artola-Mariezkurrena II.
Uniko partidua. Bestalde, datorren astean, Aretxabaletak etxekoen aurrean dauka hitzordua. Artola-Mariezkurrena IIaren kontra jokatuko dute Markina-Xemeingo Pilotaren Unibertsitatean, zapatuan (urtarrilak 26).
Sarrerak 15 euro, 20 euro eta 25 eurotan egongo direla aurreratu dute antolatzaileek, eta dagoeneko eskuratu daitezke Asegarceko webgunean.
Posta elektronikoz eta Whatsappez ere erosi ahal dira sarrerak, markinaeskupilota@gmail.com helbidean eta 606 60 20 84 zenbakian. Era berean, bihar (urtarrilak 18) eta hurrengo barikuan (urtarrilak 25) zein partiduaren egunean, 16:30etik aurrera leihatilan erosi ahalko dira.
17:45ean hasiko da pilota jaialdia, eta Eskuz Binakako Txapelketaren aurretik, Binakako Promozio Txapelketaren final laurdenetako partidua lehiatuko dute Agirre-Salaverri eta P.Etxeberria-Garmendia.
