Gorputza zelan desintoxikatu azalduko dute Etxebarrian
Gorputza desintoxikatu edo garbitzeko egokiak diren sendabelarrei buruzko azalpenak emango ditu, besteak beste, Nerea Urien adituak.
Gorputzaren desintoxikazioaz hitz egingo dute barikuan [urtarrilak 18], 19:00etan, Etxebarriko kultur aretoan. Etx Kultur Elkarteak Nerea Urien aditua gonbidatu du elikaduraren garrantziaz eta reflexologiaz jarduteko.
Urienek azaldu duenez, komenigarria izaten da garbiketak egitea. «Gorputza toxinaz beteta badago gaixotasunak hartzea errazago izaten da». Horrela, gorputza desintoxikatu edo garbitzeko egokiak diren sendabelarrei buruzko azalpenak emango ditu gaurko ekitaldian. Garbiketa prozesuan parte hartzen duten gorputzeko atalen berri ere emango du Urienek, eta garbi egoteko zeintzuk janari diren egokiak ere jakitera emango du.
Azaldu duenez, terapia naturalek ere laguntzen dute desintoxikatze prozesuan. «Reflexologiak erratz baten moduan egiten du, eta geldirik dagoen gorputzari esnatzen laguntzen dio».
