Lea-Artibaiko herritarrek ere parte hartu ahalko dute Berriatuko Ipuin eta Marrazki Lehiaketan
Lanak aurkezteko azken eguna apirilaren 12a izango da. Sari banaketa maiatzaren 7an egingo da, 18:30ean, bideo gelan.
«Parte hartzea handitu eta ipuinak idatzi eta marrazkiak egiteko zaletasuna indartu nahi izan dugu aurten», azaldu du Jon Arriola Berriatuko alkateak.
Azken urteetan modura, aurten ere gaia librea izango da, bai marrazki lehiaketan eta baita ere ipuin lehiaketan. Eta herritar bakoitzak nahi adina lan aurkeztu ahalko ditu. Hori bai, modalitate bakoitzeko sari bakarra jaso ahal izango dela esan dute.
Lanak aurkezteko azken eguna apirilaren 12a izango da. «Astelehenetik barikura, lanak udal liburutegian aurkeztu ahalko dira, 16:30etik 19:30era, gutunazal batean. Ostera antzean, PDF formatuan posta elektronikoz ere bidali ahal dira (liburutegia@berriatua.org)». Arazorik edota zalantzarik edukiz gero, liburutegira ere deitu ahal dela esan dute: 94-613 92 63. Sari banaketa maiatzaren 7an egingo da, 18:30ean, bideo gelan.
III. Ipuin eta Marrazki Lehiaketara aurketu zirenak, iazko sari banaketan.
Azpimarratu dutenez, lanak egilearen izenik gabe aurkeztu beharko dira. «Jasotzerakoan zenbaki bat jarriko zaie, eta egilearen izen-abizenak hartuko ditugu».
Modalitate bakoitzean eta adin tartearen araberako maila bakoitzean sari nagusi bat emango badute ere, parte hartzaile guztiek diploma bat jasoko dute. «Eta aurkezten diren marrazki eta ipuin guztiak ikusgai jarri eta koadernatu egingo dira».
Epaimahaia udal ordezkari batek, herriko idazle batek eta euskara irakasle batek osatuko dute.
«Eskaintza zabaltzen». Ipuin eta Marrazki Lehiaketa Berriatuko Udalak aurten liburutegirako prestatu duen agendaren baitako ekintza bat da. Aurten, gainera, udalak iazko diru partidaren bikoitza erabiliko du herriko kultur eskaintza indartzeko. «Aurten 8.000 euro bideratu ditugu, iazko partidaren bikoitza», azaldu du Arriolak. Oro har, agenda indartu eta adin tarte guztiei zuzendutako ekintzak antolatu nahi izan dituztela esan dute. «Ume eta gazteentzako ekintzak eskaintzeaz gain, helduentzako eskaintza ere indartu egin nahi izan dugu. Ekintza ezberdin gehiago antolatzeko handitu dugu diru partida».
Momentuz, ekainera arteko agenda argitaratu dute. «Irailean urte bukaerara artekoa aurkeztuko dugu».
