ETX kultur elkartearen ekimenez, gozo-gozo ospatu dute Etxebarrian San Blas eguna
Erroskilak egiten ikasi dute ume, gazte zein nagusiek Etxebarriko jubilatuen txokoan; Kandelario eguna orain dela bi urteko ikastaroan egindako kandelekin argiztatu dute.
Gazteek ondo pasatu dute oreagaz jolasean. Txiki geratu zen atzo arratsaldean (otsailak 2, zapatua) Etxebarriko jubilatuen txokoa. ETX kultur elkarteak urtero antolatzen du sasoi honetan ikastaro edo ekintzaren bat, eta atzokoan, erroskilak egiten erakutsi nahi izan zieten ume, gazte zein helduei. Adin guztietakoek parte hartzeko moduko ikastaroa izan zen, eta adin guztietakoak bildu ziren.
Irin, arraultza, naranja, anis eta olio artean eskuak sartu, eta orea erraztasun gehiago ala gutxiagogaz egiten pasatu zuten arratsaldea. Epeletan, kanpokoko txingorretik babestuta. Orea altxatzen utzi, eta 2-3 ordutan frijituta zeuzkaten erroskilak. Dastatzea baino ez zen falta.
Kanderalio eguna berreskuratuz. Orain dela bi urteko ikastaroan egindako kandelekin argitu zuten zubia 19:00ak aldera. Egunari amaiera borobila emateko modu polita izan zen.
Kultur elkartekoak pozik daude jasotako erantzunagaz, eta otsailerako aisialdia kulturaz betetzeko ekimen gehiago dituztela prestatuta aurreratu dute. “Joango gara horien berri ematen”.
