Agirreamalloak, Ibarlozak eta Uriondok Biharko Izarra Txapelketa jokatuko dute
Gaur hasiko da Mallabiako txapelketa, 21:15ean. 24 pilotarik lehiatuko dute txapelketa, bi multzotan banatuta.
Malle Euskal Pilota Klubak antolatzen duen Biharko Izarrak Txapelketa hasiko dute gaur gauean, Mallabian (21:15).
Euskal Herriko 24 pilotarik lehiatuko dute, eta tartean dira Markina-Xemeingo Esku Pilota Taldeko Josu Agirreamalloa aurrelaria eta Aimar Ibarloza atzelaria eta Endika Uriondo gizaburuagar atzelaria.
Bi multzo. Antolatzaileek aukeratutako pilotariek lehiatzen dute txapelketa. Aurtongo 24 pilotariak bi multzotan banatuta daude; multzo bakoitzean seina aurrelari eta seina atzelari daude. Hala, ez daude bikote finkoak. “Pilotari bakoitzak sei partidu jokatzen ditu, baina, beti bikote desberdin bategaz. Esaterako, aurrelari bakoitzak sei atzelari desberdinekin jokatzen du”. Gaur hasi eta maiatzaren 23a arte jokatuko dituzte kanporaketak ( partidu gehienak eguen gauetan dira, baina, zapatu arratsaldez ere jarri dituzte batzuk).
Hala, gaur gaueko jardunaldian, Markina-Xemeingo Esku Pilota Taldeko bi ordezkariak elkarren kontra ariko dira. Agirreamalloak Aizpurugaz osatuko du bikotea, eta Ibarlozak, berriz, A. Etxebarria izango du aurrelari. Beste multzoko partidua, Elola-Alduntzin eta Garcia-Aldabe bikoteen artekoa izango da.
Agirreamalloarentzat eta Ibarlozarentzat txapelketan parte hartzen duten bigarren urtea da honakoa. Peio Urionabarrenetxea Markina-Xemeingo Esku Pilota Taldeko entrenatzailearen berbetan, markina-xemeindar pilotari gazteen helburua “ikastea eta paper ona” egitea izango da. “Eurek 19 urte egingo dituzte aurten, eta ondo dabiltza, baina, txapelketan onen-onenak daude, debutatzear daudenak”.
Bestalde, Uriondok zapatuan (otsailak 23) jokatuko du, Elolagaz bikotea osatuta; Exposito eta Bikuñaren kontra ariko dira zein baino zein gehiago. Halaber, beste multzoko partiduan, Zubizarretak eta Irazustabarrenak A.Etxebarria eta Iruritaren kontra jokatuko dute. 17:00etan hasiko da zapatuko jardunaldia.
Hamaseigarrenera ailegatu da aurten txapelketa, eta urtez urte egindako lanari esker, erreferentziazko hitzordua bihurtu da. Afizionatu mailan, ospe handiko txapelketa da. Izan ere, auzken hamarkadan txapelketa lehiatu eta finalista izandako askok eta askok profesionaletan debutatu dute.
