Lekeitioko EAJk hauteskundeetarako herri programa egiteko bilera irekiak egingo ditu
Lehenengo bilera arderdikide eta alderdizaleekin egingo dute, zapatuan (otsailak 23), 18:00etan, Batzokian. Bigarrena martxoaren 9an egingo dute, herriko elkarte, erakunde eta eragileekin, 10:30ean, Silken Uribarren hotelean.
Lekeitioko EAJko taldea, 2015eko udal osaketan. Lekeitioko EAJk azaldu du udal hauteskundeetarako herri programa “serio eta erreala” aurkezteko herritarrekin bilerak egingo dituela. “Koldo Goitia Lekeitioko EAJren egungo alkatea eta datozen hauteskundeetarako alkategaia burubelarri dabil lanean. Baina ez dabil bakarrik, udal gobernua osatzen duen lantaldea ari da berari laguntzen eta”. Lehenengo bilera zapatuan (otsailak 23) egingo dute, 18:00etan, Batzokian. Eta bigarrena martxoaren 9an, 10:30ean, Silken Uribarren hotelean. Bilera biak irekiak direla azpimarratu dute jeltzaleek.
Zapatuan alderdikide eta alderdizaleekin batuko dira, “herritarren beharrizanak, arazoak eta ikuspuntuak ezagutzeko”. 2018ko otsailean ere antzeko topaketa bat egin zutela eta horretan 80 alderdikide eta alderdizale batu zirela esan dute. “Oraingoan ere beste horrenbeste batzea espero dugu, herri programako puntuak lantzeko eta aurretik egindako batzarren eta ekarpenen jarraipena egiteko”.
Bigarren bileran (martxoak 9), Lekeitioko elkarte, erakunde eta eragileetako ordezkariekin batuko dira, “etorkizuneko Lekeitio eraikitzeko ideiak batzeko”. Diotenez, aurreko hauteskundeetan egin modura, aurten ere EAJk egiten duen programa “herritarrena” izatea nahi dute. “Herritik sortutakoa, denona den herri hau denon artean eraiki dezagun”.
Bilerez gain, proposamenak batzeko posta elektroniko bat ere ipini dute: lekitarrago2025@gmail.com. “Herritarren proposamen eta ekarpenak ongietorriak izango dira”.
2025. urtean 700 urte beteko dira Lekeitio hiribildu izendatu zutenetik. Eta jeltzaleek urteurren horri begira #LekittarraGO2025 prozesua martxan jarri zuten iaz. Bada, oraingo bilerak ere, etorkizuneko herria diseinatzeko pausoak direla diote. “2025eko Lekeitio hori diseinatzeko ezinbestekoa da herritarrengana hurbildu eta haiek entzutea. Denon artean imajinatu dezagun etorkizuneko Lekeitio! Imajinatu dezagun 2025eko Lekeitio! Izan gaitezen #LekittarraGO2025!”.
