Lekeitioko Udako Arte Erakusketan izena emateko epea zabaldu du udalak
Alor ezberdinetako artistek parte hartu dezakete. Martxoaren 30era arte edukiko dute eskaera egiteko aukera.
Erakusketa, Barandiaran aretoan. Aurten ere, artez beteko da Lekeitio uda garaian. Urtero bezala, arte erakusketa antolatuko du Lekeitioko Udalak, eta erakusketetan parte hartu nahi duten artistek izena eman ahal izateko epea zabaldu dute.
Beti bezala Udako Arte Erakusketak alor ezberdinetako artistengana heldu nahi du, “arte aniztasunaren isla izan dadin”. Martxoaren 30era arte edukiko dute artistek eskaera egiteko aukera. Horretarako lekeitioko Kultur Etxera hurbildu daitezke izena ematera edota kulturetxea@lekeitio.eus helbidera idatzi.
Aukeraketa. Izena ematerako orduan artistek euren lanaren argazki eta dokumentazioa –biografia eta erakusketaren azalpenak– aurkeztu beharko ditu. Ondoren, Udaleko Kultur Sailak baloratuko ditu aurkeztutako lanak. Apirilaren erdialdera aurkeztuko dute onartu eta baztertuen zerrenda, eta ondoren, zozketa baten bidez hautatuko dituzte behin betiko parte hartzaileak. Lekeitioko eta eskualdeko artistek lehentasuna izango dutela nabarmendu du udalak.
Bestalde, artista bakoitzaren erakusketaren iraunaldia aurkeztutako artista kopuruaren arabera zehaztuko dutela azaldu dute. “Astebeteko erakusketak izango dira printzipioz, baina bi astetara luzatu daitezke aurkeztu den partaide kopurua handiegia ez bada”.
