Arkeologi Museoak Lekeitioko Armintxe kobara bisita birtuala egiteko aukera eskainiko du
Hamargarren urteurrena ospatzeko, Bizkaiko Foru Aldundiaren Arkeologi Museoak Paleolito garaiari eskainitako bi gune berri irekiko ditu bihar [apirilak 3].
Lekeitioko Armintxe koba. Bizkaiko Foru Aldundiaren Arkeologi Museoak hamargarren urteurrena ospatuko du bihar [apirilak 3] arte paleolitikoari buruzko areto berri bat irekiz. Bisitariak labar-artearekin apainduriko Bizkaiko hiru koba bisitatu ahalko ditu, haitzulo bakoitzera bisita birtual bat egiten ahalbidetzen duen Oculos aplikazioaren bidez. Lekeitioko Armintxe da bisitatu ahalko den kobazuloetako bat, beste biak Karrantzako Ventalaperra eta Galdamesko Arenaza dira.
Kobetako hormetan dauden adierazpen artistikoak ezagutu ahalko dituzte bisitariek: oreinak, hartzak, zaldiak, lehoiak eta ahuntzak. Azaldu dutenez, beira-arasa bat jarri dute argiztapen berriagaz, eta horri esker argitasun gehiagogaz ikusi ahalko dira tamaina txikiko harri, makila edo hezur jatorrizko objektuak. “Hezurrezko zintzilikariak zuloekin, Lamiñakoaren bezalakoa (Berriatua), espatulak eta azagaiak arrazoi geometrikoekin, Santa Katalinakoen bezalakoa (Lekeitio) edo animalien figurekin apainduriko kolpekariak, Bolinkobako ahuntzen bezalakoa (Abadiño); horiek dira museoan ikus daitezkeen jatorrizko obretako batzuk”.
Horrez gain, Ehiztariak-biltzaileak aretoan Bizkaiko aztarnategietan berreskuratu diren animalien fosilak ikusi ahalko dira. Besteak beste sable hagin-beko tigrearenak, jaguar europarrarenak, Mosbacheko otsoarenak, orein erraldoiarenak eta haitzuloetako lehoiarenak.
Sarrera doakoa izango da, eta bisitariek erakuste-gune berriei ematen ari zaien azken ukituak ikusteko aukera izango dute 19:00etan behin betiko ireki aurretik. Gune horien irekieran egongo dira Iñaki Garcia Camino doktorea Arkeologi Museoko zuzendaria, Mikel Unzueta Bizkaiko Foru Aldundiaren arkeologoa, eta Diego Garate Maidagan doktorea historiaurreko artean aditua eta labar-arteko azkenengo aurkikuntzen eta azterketen protagonista eta Arkeologi Museoko arkeologoa bederatzi urtez. Garatek labar-artearen inguruko azterlanen ebaluazio bat egingo du.
