Munitibarko herri ludoteka inauguratuko dute barikuan
17:30etik aurrera egingo dute inaugurazio ekitaldia. Besteak beste, eskulan tailerrak egingo dituzte, eta bertaratzen direnei ludotekari buruzko informazioa emango diete.
Herriko umeentzat egokitu berri duten Herri Ludotekaren inaugurazioa egingo dute barikuan (apirilak 5), Munitibarren. Herriko plazako lokal bat alokatu du udalak, eta Txopitturri Guraso Elkarteak kudeatuko du. Aurrerantzean, beraz, aisialdirako espazio berri bat izango dute herriko txikienek.
Lokalaren dinamizazioa Txopitturri Guraso Elkartearen esku egongo da aurrerantzean, eta herri ludotekaren erabiltzailea izan gura duten bizilagunek, udaletxera jo eta sei euro ordainduta bertako giltza eskuratuko dute udal administrazioan. “Batik bat txikienentzako leku estali baten beharra ikusten genuen. Nagusiagoak frontoian eta liburutegian ere egoten dira, baina, ume txikientzat leku egoki baten falta zegoela iruditzen zitzaigun”, adierazi dute guraso elkartearen ordezkariek.
17:30ean hasiko dute inaugurazio ekitaldia, eta hurreratzen direnekin txokolatea janez ospatuko dute ludotekaren irekiera. Era berean, eskulan tailerrak ere egingo dituztela jakitera eman dute guraso elkartearen ordezkariek.
Zehaztu dutenez, ludotekari buruzko informazio gehiago jaso nahi izanez gero barikuan bertaratu eta datuak eman zein edozein zalantza argitzeko prest daude. Halaber, iritziak trukatzeko eta proposamenak aztertzeko besoak zabalik daudela esan dute. Izan ere, ludoteka edozer lantzeko aukera berri bat dela deritzote, “posibilitatez beterik” dagoena. Umeei zein familiei zuzendutako tailerrak, ikastaroak eta antzeko ekintzak egiteko leku aproposa da: “Edozein aukera berri entzuteko eta lantzeko prest gaude”.
Auzolanean. Lokala egokitzeko bolondres lanean aritu dira gurasoak; margotu, ateak aldatu, garbitu, altzariak lortu… denen artean atontu dute lokala. “Lehenago beste ludoteka bat egon zen, baina, gela iluna zen, tristea, eta orain leku egokiagoa daukagu, eta oso argitsua, gainera. Altzarietako batzuk lehenagoko lokal haretatik berreskuratu ditugu”, azaldu dute guraso elkarteko kideek.
