Amorotoko Udabirra Fest jaia eskaintza zabalagaz dator beste urte batez
Garagardo festa baino askoz gehiago da Udabirra Fest. Egun osoan, garagardoak dastatzeko aukera eskainiko du jaiak, eta arratsaldean goi mailako paleta-goma jaialdia egingo dute.
Garagardo zaleen Lea-Artibaiko urteroko hitzordua hemen da. Zapatuan ospatuko dute Amorotoko Udabirra-Fest. Garagardo eskaintza zabala prestatu dute beste urte batez, eta egun guztian atzerriko hainbat garagardo marka dastatzeko aukera dakar jaiak. Halaber, txerri okelagaz eta saltxitxekin egindako pintxo ederrak egingo dituzte herritarrek, bertaratzen direnentzat.
Aurten, gainera, umeentzako puzgarriak ere jarriko dituzte frontoian, 11:00etatik 15:00etara.
Argazkia: Amorotoko Kultur Taldea.
Azken urteetan, kirolari ere bere lekua eman diote Udabirra-Festeko antolatzaileek. Oraingo honetan ere horrela izango da, eta etxeko palistak ez dira faltako.
17:00etan hasiko dute Goi Mailako Paleta-Goma Jaialdia. Bi bikote amorotarrek hasiko dute erakustaldia. 2018ko Bizkaiko txapelduna den Gurutz Arriagak eta 2016ko Oiartzungo txapelduna den Jon Arriagak, 2018ko GRABNI Txapelketaren irabazle diren Liher Arrizabalagaren eta Iban Zabalaren kontra jokatuko dute.
Horien ostean, Josu Imaz amorotarrak (2017ko Amorotoko txapelduna) eta Jon Azanza berriatuarrak (2015eko Mutrikuko txapelduna) bikote ezaguna izango dute aurkari. Imanol Agirre pilotari profesional ohiak eta Asier Del Horno Athletic-eko jokalari izandakoak osatuko dute bikotea.
