Aste Santu ostean zabalduko dute Etxebarriko udal gimnasioa
Gimnasioa erabili nahi dutenek izena eman behar dute udaletxean. Maiatzean monitore bat egongo da, makinen erabilera azaltzeko.
Aste Santu ostean martxan egongo da Etxebarriko Udal Gimnasioa. Udalaren asmoa Pazkuetako Idi Probak amaitutakoan zabaltzea zela azaldu du Jesus Iriondo Etxebarriko alkateak, baina azken orduko aldaketa batzuk egin beharko dituzte, eta, beraz, irekiera eguna atzeratu egingo da pixka bat.
Alkateak jakitera eman duenez, aldageletan konponketa batzuk egin eta armairuak lekuz aldatuko dituzte, aldageletara sartzeko beharrik ez daukatenek ere armairu horiek erabili ahal izateko.
Momentuz makina batzuk jarri ditu udalak gimnasio berrian, hala ere, erabiltzaileen eskariaren arabera beste batzuk jartzea ere aurreikusten dute.
Egun osoan. Udal gimnasioa erabili nahi dutenek zabalik daukate izena emateko epea. Izena udaletxean eman behar da. «Maiatzean monitore bat egongo da gimnasioan dauden makinen eta tresnen erabilera azaltzeko». Monitorea 10:00etatik 12:00etara eta 19:00etatik 21:00etara egongo da. Gimnasioaren ordutegia, berriz, 07:00etatik 23:00ak artekoa izango dela zehaztu du alkateak. «Erabiltzaileek giltz elektronikoa izango dute nahi dutenean joan ahal izateko».
