Mutrikuko Berdel Egunak beste behin ere jendez eta giroz bete du moila
Iaz eguraldiak lekuz aldatzera behartu ondoren, zapatuan [apirilak 6[ moilara bueltatu zen berriro ere pintxo dastaketa herrikoia, jai giro bikainean. Urtero legez, hitzordura hutsik egin ez zuten ehunka lagunek parte hartu zuten Mutrikuko jairik ezagunenean.
Moilara gerturatu zirenek berdelak eskaintzen dituen gastronomia aukera desberdinak ezagutzeko aukera eduki zuten. Boluntarioek eta sukaldariek mimo handiz prestatuko bederatzi errezeta bikain dastatzeko aukera egon zen: berdel errea, berdel marmitakoa, berdel piperrak, berdel bolak saltsan…
Moilako karpa azpian eta inguruetan bildutako jendea guztia probatu nahirik ibili zen. Ohi modura, portuko giroa lasai hasi zen berotzen, baina azkenean ia dena bete zen. Eta mokaduz mokadu pintxoak ere amaitzen hasi ziren. Antolatzaileen esanetan, proposamen guztiek harrera ona eduki zuten. ” Berdel bolak bukatu dira lehenengo; jendeari asko gustatu zaizkio. Berdel erreak, bestalde, estimu handia du; urtero jende asko etortzen da berdel errea probatzera”.
Euria ere jaiko protagonista bihurtu zen, inork nahi gabe. Iragarrita zegoen. 19:00ak aldera lehen euri tantak hasi ziren, baina eguraldiak pintxo dastaketa nahikoa ondo errespetatu zuen. Hori bai, dastaketa herrikoia amaitu orduko, 20:00ak bueltan, trumoi eta tximist ekaitzarekin batera zaparrada mardula hasi zuen, eta Enkore taldea ikusi nahi izan zutenek aterkiaren azpitik gozatu behar izan zuten kontzertu gorabeheratsua. Izan ere, argia joan zen kontzertua amaitzeko hiru kantu falta zirenean. “Argia etorri arte zain egon behar izan genuen”.
