909 ume, gazte eta nagusik egin dute IX. Boga! Mendi Martxa
Aurten ere erantzun ona eduki du Zubi Zahar herri ikastolaren eta Aurrera Mendi Taldearen ekimenez egindako mendi martxak. Beharrean ibili diren guztien lana eskertu dute antolatzaileek.
IX. Boga! Mendi Martxako parte hartzaile batzuk aldapan gora. Argazkia: Ondarruko Kirolaren Leihoa Eguraldi onak lagunduta, 909 mendizalek egin zuten domekan [apirilak 28] Ondarroako Aurrera Mendi Taldeak eta Zubi Zahar herri ikastolak elkarlanean antolatutako Boga! mendi martxa. Adin guztietako mendigoizaleek Ondarroa inguruko paisaiak eta toki bereziak ikusteko aukera eduki zuten.
Hiru ibilbide izan zituzten aukeran parte hartzaileek: 54 km-koa, 24 km-koa eta 11km-koa. 186k aukeratu zuten luzea, 418 animatu ziren motza egitera eta 305 lagunek osatu zuten txikia.
07:00etan irten ziren Zubi Zahar ikastolatik martxa luzeko partaideak. Kalamendi (315m), Kalamua (768m), Arno (618m) eta Tontorramendi (368m)zeharkatu zituzten eta gutxi gorabehera 12 ordutan Ondarroan zeuden gehienak, berriro. Motzekoak, berriz, 08:30ean irten ziren Kalamendi eta Tontorramendi igotzera, eta txikikoak, 10:30ean abiatu ziren Kalamendirantz. Eguerdi partera, apurka-apurka heltzen joan ziren bateko zein besteko parte hartzaileak, helburuak beteta.
Giro ona izan zen nagusi, eta mendizale guztientzako jaialdi bat izateagaz gainera Euskal Herriko Iraupen Luzeko Zirkuiturako puntuagarria ere izan zen martxa. Antolatzaileek zorionak eman eta esker ona erakutsi nahi izan diete martxa antolatzeko beharrean ibili diren guztiei.
