Zabalik dago Kamiñalderantz doan bidea
Kalea zabalik badago ere, mantenu lan txiki batzuk egitea falta dela aurreratu dute udal ordezkariek. Erreka bistaratzeko lanek ere martxa onean jarraitzen dute.
Udal ordezkariak Kamiñaldeko bidearen sarreran, auzotarrekin batera. Argazkia: Udalbarriak 2016ko martxoan itxi eta gero, Ondarroako Kamiñaldeko bidea oinezkoentzako eta ibilgailuentzat zabalik dago berriro. Udala osatzen duten indar guztiek elkarrekin zabaldu zuten bariku [maiatzak 24] arratsaldean bidea. Txalo artean kendu zuten bidea itxita mantentzen zuen hesia.
Udal ordezkariek hainbat auzotarrekin batera San Ignazio kaleko 52 zenbakiaren atzean egin zuten agerraldian amesgaiztoa amaitutzat ematen dutela nabarmendu zuten. Hiru urteren ostean egindako lan guztia eskertu nahi izan zuten udal ordezkariek, eta baita bertaratu ziren bizilagunek ere. “Ondarroako historia hurbileko gertakaririk latzenari amaiera eman nahi izan diogu horrela”.
Bidea zabalik baldin badago ere, lan guztiak ez direla amaitu aitortu dute udal ordezkariek. Kamiñaldeko bidean, esate baterako, mantenu lan txiki batzuk egingo dituzte asteon: mendi magalean sentsoreak ipiniko dituzte eta belarra hazteko haziak botako dituzte. Hori dela eta, maiatzaren 31ra bitartean, ezingo da bide bazterrean aparkatu. “Astebeteko lanak aurreikusten dira, beti ere eguraldiaren arabera”. Mendiaren atzealdean ibaia bistaratzeko eta Antiguara doan bide berriaren lanak ere ez dituzte amaitu. “Aurreikuspenak betetzen badira, uztailaren 3rako amaituko dituzte”.
Kamiñaldeko bideari dagokionez, lehen modura, norantza bikoa izaten jarraituko du, aparkalekua dagoen tokira arte. 70 autorentzat tokia du aparkalekuak. Aparkalekuaren hegal batean, bestalde, hondakin gunea ipiniko dute; ekainaren 16a orduko ipiniko dituzte edukiontziak.
