Umeen Euskal Jaiak 120 dantzari inguru batuko ditu Mutrikun
Beste behin ere egun osoko egitaraua prestatu du Gure Ametsa dantza taldeak. Mutrikuko eta Zarauzko dantzariek parte hartuko dute. Erromeriarekin amaituko da jaia, Beheko Plazan.
Dantzari gazteak orain bi urteko Euskal jaian dantzan 38. Umeen Euskal Jaia egingo dute domekan [ekainak 2] Mutrikun. Mutrikuko Gure Ametsa dantza taldeko eta Zarauzko Jalgi taldeko dantzariek parte hartuko dute aurtengo jaian.
Gure Ametsako ordezkariek zehaztu dutenez, gutxi gorabehera 120 dantzari inguruk parte hartuko dute jaian. «Mutrikuarrak 90 inguru izango dira, eta besteak zarauztarrak».
Goizean Albokako plazan batu eta gero, kalejira egingo dutela zehaztu dute. «Albokako plazatik Beheko Plazara joango gara, eta handik Goiko Plazara». Ostean, dantza erakustaldia egingo dute Goiko Plazan.
Bazkaltzeko tartetxo bat hartu eta gero, jaiak Beheko Plazan jarraituko du. «Joxe Mendizabal musikariak lagunduta, erromeria egingo dugu Beheko Plazan, 19:00ak arte».
Joan den astean Erromeria Eguna egin eta gero, asteon ere dantzak izango dira Mutrikun protagonista. Eta azkenean aurreko astean eguraldia aldeko eduki zuten modura, oraingoan ere berdin gertatuko dela diote. «Eguraldia erosita daukagula ematen du».
EGITARAUA:
- 10:30. Talde guztiak batuko dira, Albokako plazan.
- 11:00. Kalejira.
- 13:30. Dantza saioa, Goiko Plazan.
- 17:00. Erromeria, Beheko Plazan.
