Barikurako aurkeztu behar dira Aulestiko ipuin topaketarako lanak
Topaketan LH 1etik 18 urtera arteko aulestiarrek parte hartu ahal dute. Urregarai eskolako ikasleek eskolan bertan aurkeztu behar dituzte lanak, eta besteek posta elektronikoz bidali beharko dituzte (urzabalgurel@gmail.com).
Aulestiko 2019ko ipuin topaketako sari banaketa. Abian da beste behin ere Aulestiko 31. Ipuin Topaketa. Ekimenean parte hartzeko, lanak barikuko 19:00etarako [ekainak 7] aurkeztu behar dira. Gaia librea dela esan dute topaketa antolatzen duen Urzabal guraso elkarteko kideek.
Topaketan Lehen Hezkuntzako 1. mailatik 18 urtera arteko aulestiarrek parte hartu ahal dute. “LH 1 eta 2koek ipuinak boligrafo edo errotulagailu beltzarekin idatzi beharko dituzte, eta txantiloi berezi baten idatzi beharko dute. Bi maila horietakoek, gainera, marrazki bat ere gehitu ahal diote ipuinari, txantiloi berdinean”. LH 3tik aurrerakoek, ostera, ordenagailuz idatzi beharko dituzte ipuinak.
Lanak Urregarai eskolara eraman behar dira eta irakasleek gordeko dituzte. Eskolako ikasleak ez direnek, ipuina posta elektronikoz (urzabalgurel@gmail.com). “Ez ahaztu marrazkiak bidaltzeaz”.
Azaldu dutenez, ipuinak dauden bezala inprimatuko dituzte. “Testuak zuzenduta aurkeztu beharko dira”. Gogorarazi dute, parte hartzaile guztiek izen-abizenak, maila eta adina ipini beharko dituztela, bai ipuinean eta baita marrazkian ere. “Izenik gabeko ipuinik ez dugu inprimatuko. Eta epez kanpo aurkezten diren lanak ere ez dira topaketan sartuko”.
Parte hartzaile guztiek jasoko dute saria eta agiria. Urtero egin modura, sari banaketa ekitaldia ekainaren 24an egingo da, meza ostean.
