200 lagunetik gora batuko ditu Mutrikuko Arnoko XV. mendi lasterketa eta ibilaldiak
Antolatzaileek iragarri dutenez, 92 lagunek eman dute izena lasterketan. Oinezko proban, berriz, 107 daude izena emanda. Dena dela, oinez gehiago izango direla uste dute. 22 kilometroko eta 1.097 metroko desnibel metatua duen ibilbidea osatu beharko dute proba bateko zein besteko parte hartzaileek.
Mendizaleak, iaz, Arnoko ibilaldia egiten. Argazkia: Burumendi Mendizale Elkartea Mutrikuko Burumendi Mendizale Elkarteak antolatuta, Arnoko XV. mendi lasterketa eta ibilaldia egingo dituzte domekan [ekainak 9], Mutriku inguratzen duten mendietatik zehar. Antolatzaileek iragarri dutenez, 92 lagunek eman dute izena lasterketan. Oinezko proban, berriz, 107 parte hartzailek eman dute izena. Baina oinez gehiago izango direla uste dute. Mendi ibilaldian parte hartu nahi duten oinezkoek domekan bertan izena emateko aukera edukiko dute kirol proba hasi baino ordu erdi arinago, Goiko Plazan.
Mendi martxan parte hartuko dutenek 08:00etan irtengo dute Goiko Plazatik. Korrikalariek bi ordu beranduago irtengo dute leku beretik. “Dortsalak irteera puntuan banatuko ditugu, 08:30etik 09:50era”.
Urteroko ibilbide bera osatu beharko dute proba bateko zein besteko parte hartzaileek. Goiko Plazako helmugara iritsi aurretik, 22 kilometroko eta 1.097 metroko desnibel metatua duen ibilbidea osatu beharko dute honako tokietatik: San Juan, Kalbaixo, Apain, Arno kurutzea, Arnoko aterpea, Ameikutz, Kostolamendi, Armentxa, Berrosasi, Santakutz, Pikupe, Galdona, Santa Elena.
Sariei dagokienez, lasterketaren lehen hiru sailkatuek garaikurra eta saria dute saria. Mutrikuko lehenak eta beterano mailako lehenak ere, garaikur bana jasoko dute. Sari banaketa egin eta gero, hainbat produktu zozkatuko dituzte.
