Joseba Ituarte markina-xemeindarra fitxatu du Athleticeko kadete taldeak
Atzelari markina-xemeindarrak kadete mailako B taldean jokatuko du.
Joseba Ituarte, Eibarko taldeagaz partidu bat jokatzen. Argazkia: Joseba Ituarte / Instagram Joseba Ituarte (Markina-Xemein, 2005) Eibarko taldetik fitxatu du Athleticak. Kadete mailako B taldean ariko da datorren denboraldian Andoni Galianoren esanetara; kadeteen ohorezko mailan. Bi denboraldi egin ditu Eibarren (2017/2018 Txiki mailan eta 2018/2019 Txikien Ohorezko Mailan). Lehen fasea lidertzan amaitu zuten eibartarrek, Gipuzkoako Txikien Ohorezko Mailan. Bigarren fasea, ostera, bosgarren postuan amaitu zuten, sailkapenaren erdialdean. Atzelari postuan jokatu ditu neurketa gehienak, eta ezkertia da.
Talde armaginean aritu aurretik Markina-Xemeingo Artibairen eta Ondarroako Aurreraren kategoria txikietan ibili zen. Aurreran, esate baterako, alebin mailan aritu zen, eta txiki mailetarako jauzia eman behar zuenean fitxatu zuen Eibarrek.
