Raluka Ungureanuk eta Yassine Bihek irabazi dute Markina-Xemeingo Herri Krosa

72 atletak parte hartu zuten 21. Atletismo Eguneko Herri Krosean. Helduez gain, umeek ere parte hartu zuten Atletismo Egunean.

Eider Mugartegi

Markina-Xemein

2019/07/08

Atletaz bete zen, zapatu arratsaldean [uztailak 6], Markina-Xemein. Txupetetik hasi eta nagusiak arte, adin guztietako kirolariak gozatu zuten atletismoagaz. 72 atletak egin zuten aringa-aringa 21. Atletismo Eguneko Herri Krosean, eta nagusitasun osos eraman zituzten txapelak Yassine Bihek gizonezkoetan eta Raluka Ungureanu Ispizuak emakumeetan.

Beste korrikalariei ihes eginda, bakarrik heldu zen Yassine Bih Zelaiko helmugara, eta besoak altzatuta ospatu zuen garaipena. 0.23.24 denboran osatu zuen 7,8 kilometroko ibilbidea. Helmugaratzen bigarrena Ahmed Moujane (0.23.59) izan zen eta Hicham El Amranik (0.24.31) osatu zuen podiuma. Herriko lehen gizonezkoa Jonan Bilbao Omaetxebarria gaztea izan zen. 0.27.07 denboran osatu zuen krosa.

Raluka Ungureanu Ispizua bermeotarra helmugara heltzen.

Pozik helmugaratu zen bai eta Raluka Ungureanu Ispizua bermeotarra ere. 0.30.59 denbora eginda igaro zen helmuga azpitik. Bigarren emakumea, berriz herrikoa izan zen, Lide Azkue Iruretagoiena (0.33.48) eta Ane Garrido Ramos (0.34.11) ermuarrak osatu zuen podiuma.

[Herri Kroseko sailkapena]

Helduez gain, umeek ere parte hartu zuten Atletismo Egunean; izan ere, txupete mailako probekin hasi zen kirol ekimena. Ordu eta erdi inguruan jardun zuten atletek abiadura probetan eta erreleboetan parte hartzen. Abiadura proben ondoren kros txikia eta pisu jaurtiketa egin ziren. Kros txikian Laida Larrinaga nesketan eta Issam Arabat mutiletan izan ziren irabazleak.

ABIADURA PROBETAKO SAILKAPENAK

Infantil maila 80m neskak