Aulestiko horma-irudiak zaharberritzeari ekin dio udalak
Trolebu Kultur Elkarteko eta Herri Batasunako kideek 90eko hamarkadan egindako margolanak berritu dituzte gaur gaurkoz. Ikusi Arte enpresa kontratatu dute lanak burutzeko, eta asmoa herritarrek urte luzez aurrera eramandako borrokak bistaratzea da.
Ikusi Arte enpresako langileak Trolebu Kultur Elkarteko kideek margotutako horma-irudia. Aulestiko Udalak herrian dauden “horma-irudi historikoak” berritzeari ekin dio. Gaur gaurkoz hiru dira zaharberritu dituzten margolanak, eta Lekeitioko Ikusi Arte enpresa kontratatu dute lanak burutzeko. 90eko hamarkadako horma-irudiak dira gehienak, Trolebu Kultur Elkarteak eta Herri Batasunak margotutakoak.
«Eskola txikien eta medikuak euskalduntzearen aldeko kanpainen margolanak dira, batetik, Trolebu Kultur Elkarteak egindakoak. 1991n eta 1998an margotu zituzten. Bestea, Herri Batasunako kideek egin zuten, eta Euskal Herria ageri da Denon artean Euskadi askatuko dugu lemarekin. 1989an maergotutakoa da», adierazi du Jone Antsotegi Aulestiko alkateak.
Horrez gain, kanposantu inguruan, Lekeitiora doan bidean, erdi ezabatuta dagoen margolana ere berreskuratu nahi duela esan du Antsotegik, Euskara oztopo guztien gainetik esaldia margotuta daukana, hau ere Trolebuko kideek egindakoa.
Herri Batasunak egindako horma-irudia. Argazkia: Eli Azpiazu
Historia aldarriaktuz. Herritarrek urte luzez aurrera eramandako borrokak bistaratzeko asmoz, eta aurreko legealdian sortu zen ideiari jarraipena emanez, herri batzar parte hartzailean erabaki dute udal ordezkariek proiektua martxan jartzea.
Horretarako, aurrekontuaren parte bat gorde eta horma-irudiak zaharberritzera bideratu dutela adierazi du alkateak: «Herrian hiru horma-irudi adierazgarri daude, urte askotan herriaren bizitasunaren adierazgarri izan direnak. Berritze prozesu honekin Aulestiko historia aldarrikatu nahi dugu».
Alkateak gogoratu du iraganean beste horma-irudi asko zeudela herrian, baina eraikinak berritzearekin batera desagertu egin zirela, hala nola, frontoian zegoena biziki gogoratu du Antsotegik.
