Etorkizuna izango da Ondarroako Kuadrilla Eguna ospatzeko aukeratu duten gaia
Kuadrilla Eguneko lan taldeak aurreko urteotako antzeko egitaraua mantentzea erabaki du. Hurrengo batzarra uztailaren 15ean egingo dute.
Herriko zenbait lagun talde Kuadrilla Eguna antolatzen dabiltza, eta aurtengo gaia Etorkizuna izango dela erabaki zuten astelehenean [uztailak 8] egindako batzarrean. Era berean, kuadrillen egun handirako aurreko urteotako antzeko egitaraua mantentzea ere erabaki zuten.
Kuadrilla Eguneko lan taldeak jakitera eman dutenez, hurrengo batzarra datorren astelehenean [uztailak 15] egingo dute. Hitzordua 18:00etan ipini dute, Kofradia Zaharreko lehenengo solairuan. Herriko kuadrillei batzarrera joateko deia luzatu diete, adina edozein delarik ere, Kuadrilla Eguneko parte hartzaile herritar guztiak egin nahian.
Herritarrak dagoeneko hasiak dira gaiagaz lotutako mozorroak prestatzen. Herriko kuadrilla guztiei deia egin diete euren egunari kolorea eta bizitasuna eman diezaioten, eta horregatik aurtengo gaiagaz zerikusia daukan edozein mozorro jantzi eta jaian parte hartzeko deia egin diete.
