Txomin Agirre azpiko aparkalekuetan izena emateko epea uztailaren 15ean zabalduko du Ondarroako Udalak
Eskaerak udaletxeko erregistro orokorrean aurkeztu beharko dira irailaren 20a baino lehen. Pertsona bakoitzeko eskaera bat aurkeztu ahal izango da, eta gogorarazi dutenez, soilik ibilgailu partikularrak sartu ahalko dira aparkalekuetan.
Txomin Agirre azpiko aparkalekuaren sarrera Txomin Agirre ikastolaren sotoan dauden aparkalekuak emakida modura eskatzeko epea uztailaren 15ean hasi eta irailaren 20an amaituko dela iragarri du Ondarroako Udalak. Eskaerak udaletxeko erregistro orokorrean (Kantoipe kalea, 1) aurkeztu ahal izango dira, lanegunetan, 09:00etatik 14:00etara. “Epez kanpo aurkezten diren eskabideak ez dira onartuak izango”.
Eskabidea eredu ofiziala beteta eta sinatuta aurkeztu beharko da, eta pertsona bakoitzeko eskaera bat aurkeztu ahal izango da. Gogorarazi dutenez, soilik ibilgailu partikularrak sartu ahalko dira aparkalekuetan. “Partzelak bakarrik autoak aparkatzeko erabili ahal izango dira. Sarrerako ateko altueragatik nabaria denez, ibilgailu altuagorik ezin da sartu”.
Herritarren eskura ipini dituzte aparkalekuak eta trastelekuak emakidan emango dituzte, 30 urterako. Ibaiondo kaleko 4ko sotoko bi solairutan banatuta, 137 aparkaleku egongo dira aukeran, horietatik zortzi, trastelekuagaz. Trasteleku gabeko aparkalekuak 14.600 eurotan (15.622 euro guztira) eskuratu ahal izango dira. “Prezio bera izango dute partzela guztiek, haien kokalekua edozein izanik ere”. Trastelekua daukaten partzelen prezioa, berriz, 20.500 eurokoa (21.935 euro guztira) izango da, kokalekua edozein delarik ere.
Txomin Agirre sotoko aparkalekuak. Argazkia: Udalbarriak
Jakitera eman dutenez, aparkaleku partzela horietatik hiru mugikortasun murriztua duten pertsonak garraiatzen dituzten ibilgailuentzat daude gordeta. Trasteleku batekin lotua dagoen zortzi partzeletako bat ere mugikortasun murriztua duten pertsona garraiatzen dituzten ibilgailuentzat dago gordeta. “Partzela bakoitza mugatua eta zenbatua dago. Udalak erabakita daude bakoitzari zein zenbaki dagokion”.
Eskatzaileen kopurua aparkaleku kopurua baino handiagoa baldin bada, udalak ezarritako lehentasunen arabera esleituko dituzte aparkalekuak
Eskabidea egiterako orduan hurrengo dokumentazioa aurkeztu beharko dute eskatzaileek: NAN, Foru Ogasunarekiko eta Gizarte Segurantzarekiko zerga betebeharrak ordainduta edukitzearen ziurtagiriak. Mugikortasun murriztua dutenentzako gordetako partzelaren bat eskatzen dutenek Ezinduentzako Txartela ere aurkeztu beharko dute. “NAN eta Foru Ogasunarekiko eta Gizarte Segurantzarekiko zerga betebeharrak ordainduta edukitzearen ziurtagiriak izan ezik, beste dokumentazioa udalak berak ofizioz baieztatuko du. Bestalde, zergak Ondarroan ordaintzen dituzten enpresen ibilgailuen kasuan, eta ibilgailua darabilena titularra ez den kasuetan, enpresako kudeatzaile edo administratzailearen ziurtagiria aurkeztu beharko da, ibilgailua norberak bakarrik erabiltzen duela ziurtatzeko. Kasu horietan ibilgailuaren zirkulazio baimena ere aurkeztu beharko da”.
Aurkezten diren eskabide guztiak Aukeraketa Mahaiak onartu edo baztertuko dira. Eskatzaileen kopurua aparkaleku kopurua baino handiagoa baldin bada, udalak ezarritako lehentasunen arabera esleituko dituzte aparkalekuak. Lehenengo mailako lehentasuna izango dute eskariak aurkezteko epea baino arinago Ondarroako udal erroldan inskribatuta daudenek eta ibilgailuren baten zergak udalerrian ordaintzen dituztenek. “Enpresen ibilgailuen kasuan, ibilgailuaren titularra ez bada, ziurtagiri bidez frogatu beharko da eskatzaileak soilik erabiltzen duela ibilgailu hori”. Bigarren mailako lehentasuna, berriz, Ondarroako udalerriaren eremuan jarduera ekonomikoen gaineko zergan altan daudenek edukiko dute. Hirugarren mailako lehentasuna, azkenik, Ondarroan etxebizitza bat dutenak, eta Ondasun Higiezinen Zerga ordaintzen dutenek edukiko dute.
Partzelak zozketa publiko bidez banatuko dira, onartutakoen artean. Zozketa udaletxeko pleno aretoan egingo da, udalak aurrerago zehaztuko duen datan. Emakidak banatzeko prozedurari buruzko dudak argitu nahi dituztenek hirigintza bulegora jo beharko dute, astelehenetik barikura, 09:00etatik 14:00etara. “Edozeinek aztertzeko moduan daude bai lizitazioari buruzko espedientea eta bai beronen dokumentazio teknikoa”.
Ikusi HEMEN baldintza ekonomiko eta administratibo guztiak.
