30. urteurrena ospakizunez beteta dakar Lekeitioko Kaleka jaialdiak
Eguenetik [uztailak 18] domekara [uztailak 21] bitartean aniztasun handiko 21 ekintza eskainiko dituzte 18 kolektibo eta konpainiak Lekeitioko Nazioarteko Kale Arteen Jaialdian.
Iaz jaialdian eskainitako 'L'Entresort'-Tetes de Mules lana (Euskal Herria-Frantzia). Argazkia: Kaleka Badator kale arteen hitzordua Lekeitiora. Egunenetik [uztailak 18] domekara [uztailak 21] bitartean, Lekeitioko Nazioarteko Kale Arteen Jaialdia egingo dute herriko hainbat plaza eta txokotan. Aurten, gainera, 30. urteurrena ospatuko du Kalekak, eta antolatzaileek aurreratu dutenez, aniztasun handiko ekintzaz betetako egitaraua dakar. Beste batzuen artean, eduki, formatu eta hizkuntza anitzak lantzen dituzten keinu antzerkia, dantza, zirkua, clowna, esperimentazio guneak, kabareta, piroteknia, txotxongiloak eta proposamen instalatiboak eskainiko ditu.
18 kolektibo eta konpainiak 21 lan eta ekintza emango dituzte erakustera. Euskal Herriko artistez gain, Italiako, Frantziako, Txileko, Erresuma Batuko, Alemaniako, Galiziako, Kataluniako, Toledoko eta Kantabriako artisten bilgune ere izango da Lekeitio. Sail ofizialak Cia ytuquepintas, 7 Bubbles, Murmuyo, Chiara Marchese, Sincronacidas, La Nordika, Zero en Conducta eta Lokkeren ikuskizunak hartuko ditu, baita ere Zanguango eta Lekittoko Deabruak konpainien proposamen ibiltariak ere.
Sail ofizialeko proposamenez gain, garapenean edo sorkuntza prozesuan dauden lanak biltzen dituen Kaleka Scratcheko lanak ere ikusgai egongo dira, eragile kulturalen, artisten eta publikoaren arteko sormen harreman trukaketa gune bihurtuz. Scratch sailerako bost konpainia eta kolektiboren lanak aukeratu dituzte: La Buena Compañia, Cie De-Chainee,Compañia La Intrepida,Cia Es Circ eta Lokke/Olatz de Andres.
Modu berean, hiru esperimentazio gune ere landuko dira. Alde batetik, Truca Rec kolektiboa Kaleka Egin gunea diseinatzearen arduraduna izango da, Stampa deritzon proposamengaz. Bestetik, Createctura kolektiboak Kairos [gune doia] izeneko espazioa inauguratuko du, Paisajes de juegos instalakuntzaren bidez. Eta sail ofizialaren barruan, gainera, 7 Bubbles taldeak tamaina eta itxura askotariko xaboi burbuilekin esperimentatzeko joko espazio bat ere proposatuko du.
