Emozioz bete dute Uniko kantxa Elorrioren omenezko txapelketaren finalek
Arakis eta Oier, Aaron eta Atain II. eta Kosme eta Manzi izan dira maila bakoitzeko irabazleak. Omenaldia egin zioten orain dela urtebete zendu zen zesta-puntako izarrari.
Kosme eta Manzi Elorrioren omenezko txapelketako nagusien mailako irabazleak eta Elorrioren senideak sari banaketan. Norgehiagoka bizi eta momentu hunkigarriez bete egon ziren zapatuan [uztailak 20] Victor Bereikua Elorrioren omenez jokatu den txapelketaren finalak. Minutu bateko ixilunea egin zen bigarren finalaren ostean, eta omenaldia egin zioten amaieran. Frontoian bildutakoen babesa eta maitasuna eraman zituzten Elorrioren senideek.
Orain dela urte bete zendu zen pilota adituen esanetan munduko pilotaririk handienetakoa izan zen Victor Bereikua Elorrio, eta haren omenezko txapelketa jokatu da Markina-Xemeingo Pilotaren Unibertsitatean. Markina-Xemein, Berriatua, Gernika-Lumo, Zumaia, Mutriku, Bermeo, Iparralde eta Gasteizko punta-puntako pilotariak batu ditu Elorrioren omenezko norgehiagokak. Hiru kategoriatan banatuta jokatu dute pilotariek: gazte, nagusi eta elite mailan.
Talde argazkia atera zuten jaialdiaren amaieran.
Gazte mailan, Arakistain eta Oier, Zelaiaren eta Alainen aurka neurtu ziren finalean; bigarren mailan, Aaron eta Atain II.a Alex Goitiandiaren eta Danel Mandiolaren aurka aritu ziren, eta maila nagusian, berriz, Hormatxea eta Ibarluzea, Cosmeren eta Manziren kontra. Hormaetxearekin batera, Etxebarrietak jokatu behar zuen finala, baina Ibarluzeak hartu zuen haren lekua.
Arakisek eta Oierrek irabazi zuten lehenengo finala 30-25. Aurretik jarri ziren eta tinko eutsi zioten hartutako abantailari. Aaron eta Atain II. nagusi izan ziren bigarren norgehiagokan. Hasieratik jarri ziren aurrean, eta 11 tantoko aldea ere eduki zuten partiduaren momentu batean (21-10). Hala ere, Danel Mandiola eta Alex Goitia ez zeuden etsiteko, eta azken tantora arte borrokatu zuten. Berdinduagoa izan zen maila nagusiko partidua. 8nako berdinketaren ostean, aurretik jarri ziren Kosme eta Manzi (gorriz), eta horrela jarraitu zuten amaierara arte. Publikoaren animorik ez zuten falta izan Gaizkak eta Ibarluzeak, eta urdinak 24-22 hurreratu baziren ere, ezin izan zituzten gorriak gainditu. 30-26 irabazi zuten Kosmek eta Manzik.
Partiduak amaitu eta berehala eman zituzten sariak. Elorrioren senideek egin zuten sari banaketa, eta ostean omenaldia egin zioten zesta-puntako izarra izan zenari. Elorrioren ibilbidea gogoratuta, lore txorta oparitu eta aurreskua dantzatu zieten senideei. Hunkituta eta esker onez hartu zuten omenaldia senideek. Zesta-punta zale eta pilotari ohi ugari batu zituen ekitaldiak.
