Abuztuan Atxondo kiroldegia ixtea erabaki du Markina-Xemeingo Udalak
Erabiltzaileekin eta kiroldegiko langileekin berba egin eta datu ekonomikoak aztertu ondoren hartu du udalak erabakia.
Markina-Xemeingo Atxondo kiroldegia itxita egongo da abuztuan. Erabakia Markina-Xemeingo Udalak hartu du, erabiltzaileekin eta langileekin berba egin eta gero eta datuak aztertu ondoren. Esan dutenez, abuztuan kiroldegia zabalik edukitzeagatik udalak ordaindu beharreko diru saila instalazioak hobetzera bideratuko dute.
Atxondo kiroldegia iazko abuztuan egon zen zabalik, estreinako. Horren aurrean, udalak iaz modura irekita mantendu edo ez erabaki behar izan du azken egunotan. Erabaki hori hartzerakoan, abuztuko erabiltzaile kopurua eta diru sarrerak eta gastuak mahai gainean ipini dituzte, besteak beste. “Abuztuan urte osoko erabiltzaileen %18k erabili zuten kiroldegia, eta diru sarrerak 752,01 euro izan ziren. Gastuei dagokienez, aurten abuztuan kiroldegia zabalik edukitzeagatik udalak 17.263,09 euro (14.267,02 euro + %21eko BEZa) ordaindu beharko lizkioke EmteSPORT enpresari”.
Datu horiek aurrean edukita, udal ordezkariek iazko abuztuan igerilekua eta gimnasioa erabili zuten herritarrekin hitz egin zutela esan dute. “Horiek ez dute txarto ikusten abuztuan kiroldegia ixtea, baldin eta horrek urte osoko funtzionamendua sendotzen badu. Eta langileen ordezkariek ere esan dute hilabetez kiroldegia itxita egoteak ez duela langileengan eragingo”. Azterketa egin ondoren erabaki du udalak kiroldegia kudeatzen duen enpresari ordaindu beharrekoa instalazioak hobetzera bideratzea.
Dena dela, kiroldegiko erabiltzaileek inguruko herrietan “zerbitzua bermatuta” edukiko dutela esan dute. “Atxondo kiroldegiko bazkideek Lekeitioko eta Ondarroako kiroldegietara joateko aukera edukiko dute, kiroldegiko txartela erakutsita”.
