Ispasterren ospatuko da irailaren 8an II. Euskal Diasporaren Eguna
Ospakizun herrikoi eta parte hartzailea izango da, eta Lea-Artibaiko eskualdeari zein euskal gizarte osoari gonbidapena egin diete egingo diren ekitaldietan parte har dezaten.
II. Euskal Diaspora Egunaren aurkezpena, Ispasterren Irailaren 8a egun handia izango da Ispasterren. Emigrazio mota desberdinen “isla ezin hobea” delako, II. Euskal Diasporaren Eguna ospatzeko aukeratu dute herria. 12:00etan hasiko dira ospakizunak, antzerkia, musika eta dantza tarteko, eta Iñigo Urkullu Lehendakaria ekitaldian egongo da. “Bertatik, mende bakarrean, 1.000 ispastertarrek baino gehiagok emigratu zuten bost kontinenteetara”, adierazi du aurkezpen ekitaldian Garbiñe Saenz de Buruaga herriko alkateak.
Euskal diasporari buruzko erakusketa bat ere inauguratuko dute ospakizun egunean, eta hamabost egunez egongo da zabalik, eskolako umeek ere Euskal Herriko eta herriko historia ezagutzeko aukera eduki dezaten. “Norbaitek etxean dokumentu, gauza edo tresnarik balu, oraindik sasoiz dago ekartzeko, momentu ona da ekartzeko”, nabarmendu du alkateak. Udaletxera deitu edo joan besterik ez da egin behar.
II. Euskal Diaspora Egunaren aurkezpen ekitaldia
Ospakizuna Bizkai, Araba eta Gipuzkoako bazter guztietara eta herri mailara zabaldu nahi dutela azaldu du Marian Elorza Eusko Jaurlaritzaren Kanpo Harremanetarako idazkari nagusiak, eta bai berak eta bai Ispasterko alkateak Lea-Artibaiko eskualdeari nahiz euskal gizarte osoari Ispasterren izango den ekitaldian parte hartzeko deia egin diete. Kanpoan bizi eta egun horretan berton dauden euskaldunei ere gonbidapena luzatu diete, euskal disporaren berri izateko egun seinalatua dela azpimarratuz. Era berean, kanpoan dauden euskal komunitateko kideak euskal etxeek antolatuko dituzten ekitaldietan parte hartzera deitu dituzte.
Ospakizun parte hartzailea. Herritarren parte hartze zabalagaz egingo dira ospakizunak, eta alkateak eskainitako laguntza eta prestutasuna eskertu nahi izan die guztiei. Joan den astean egin zuten lehenengo entsegua, eta datorrenean egingo dute bigarrena. “Orain, eguraldiak laguntzea baino ez da falta”.
