Aldundiak dio GI-638 errepideko proiektua 2020ko urtarrilaren bukaeran amaituko dutela
Lanek etenik gabe jarraituko dutela eta bide baten mozketak egin beharko direla nabarmendu du Aintzane Oiarbide Gipuzkoako Foru Aldundiko Bide Azpiegituretako diputatuak gaur Mutrikura egin duen bisitan.
Aintzane Oiarbide Gipuzkoako Foru Aldundiko Bide Azpiegituretako diputatua Mutriku-Deba errepideko lanak bisitatzen. Argazkia: Gipuzkoako Foru Aldundia Lau hilabetez itxita egon ondoren, bihartik [irailak 3] aurrera zabalik egongo da berriro ere Mutriku eta Deba batzen dituen GI-638 kostako errepidea. Aintzane Oiarbide Gipuzkoako Foru Aldundiko Bide Azpiegituretako diputatuak gaur [irailak 2] bisitatu ditu lanak, eta azpimarratu duenez, obrak martxa onean doaz. Lanak otsailean hasi zituzten, 10 milioi euroko aurrekontuarekin, eta 2020ko urtarrilaren bukaeran amaitzea aurreikusten dituzte.
Bihar goizean zabalduko dute bidea zirkulazioaren noranzkoa kontuan hartuz; 10:00ak aldera Debatik Mutrikuko noranzkoa irekiko dute, eta, 11:00etan, alderantzizkoa. Gogorarazi duenez, errepidea zirkulaziora zabalik egongo bada ere, obretan jarraituko dute. Hori dela eta, noizbehinka, errepideko bide bat itxiko dute, eta zirkulazioa semaforoarekin gidatuko dute.”Ezin dugu ahaztu proiektua amaitu arte, beste bost hilabetez, lanek etenik gabe jarraituko dutela eta errepideko bide baten mozketak egin beharko direla”.
Errepidea itxita egon den tartean, batez ere, Ipitxarriko bihurgunean eta Alkoleako tunel berrian lanean aritu direla esan du Oiarbidek. “Plataformaren zabalgunea eta oinezkoen pasealekuko egitura ere ia bukatuta daude zati nagusian”. Agertu duenez, honakoak izango dira egin beharreko lanik garrantzitsuenak: Alkoleako tunela gauzatzea, garbiguneko hormaren egonkortzea eta puntu horretan oinezkoentzako plataforma eta pasealekua zabaltzea, Ondarbeltz horman hegalkina egitea eta ingurumena lehengoratzea.
