Martitzen goizean zabalduko dute Mutriku eta Deba arteko GI-638 errepidea
Maiatzaren 2an itxi eta lau hilabetera, berriro zabalduko dute kostako errepidea. 10:00etan Debatik Mutrikurako bidea zabalduko dute, eta 11:00etan Mutrikutik Debara doana.
Maiatzaren 2an itxi zuten Mutriku eta Deba arteko kostaldeko errepidea (GI-638). Orain, lau hilabete beranduago, zabaldu egingo dutela iragarri du Gipuzkoako Foru Aldundiak. Oraindik ere lanean jarraituko badute ere, errepidea guztiz itxita egoteko arrazoirik ez dagoela jakitera eman dute. Debatik Mutrikurako norazkoan zabalduko dute lehendabizi, 10:00etan. Ordubete beranduago (11:00), ostera, Mutrikutik Debara joateko bidea.
Lanak “aurreikusitakoaren arabera garatu” direla esan du Gipuzkoako Foru Aldundiak. Dena dela, martitzenetik [irailak 3] aurrera, tarteka, errepideko bide bat itxiko dute, eta zirkulazioa semaforoagaz gidatuko dute.
Kostaldeko errepidea zabaltzeaz batera, irailaren 4tik [eguaztena] aurrera txirrindulariek eta ibilgailuek debeku barik igaro ahalko dute Galbaixo. “Debekua ezartzen duten seinaleak kenduko ditugu”. Hori bai, kostako errepidea itxi aurretik kamioientzako zegoen gehienezko pisua muga ezarriko da berriro. “Seinale horiek berriro ipiniko ditugu”. Hau da, Galbaixoko bidea lehen zegoen moduan geratuko da. Egun berean, gainera, Lurraldebusen autobusen zerbitzua normaltasunez hasiko da lanean. “Betiko autobus handiak erabilita, eta herriko geltoki bietatik eta Urazamendi auzotik igarota”.
Mutrikuko udal ordezkariak ere pozik agertu dira aldundiak igorritako oharraren aurrean. “Mutrikuarrok entzun nahi genuen albistea da”. Dena dela, kostako bideko proiektua osotasunean amaitu arte herritarrei pazientziaz jokatzeko eskatu diete.
