Gogo biziz hasi dituzte San Antolin jaiak lekeitiarrek
Atzo heldu zen Antero Lekeitiora, eta, urtero modura, mozorroak jantzita eman zioten herritarrek ongi etorria San Antolin jaietako protagonistari. Atzo giro ederrean ibilita, egun nagusiagaz gozatzeko aukera eduki dute gaur.
Udaletxetik elizarainoko prozesioa egin dute agintariek. Plazaren apainketagaz, futbol partiduekin eta Senegaldarren jaiagaz hasi ziren berotzen jaiak zapatuan [Abuztuak 31], eta Bajada Egunagaz egin zuten eztanda atzo [irailak 1]. Urtero modura, giro onez bete zuten plaza kuadrillek, eta handik eman zioten ongietorria Anterori. Gotikoek eraman zuten kuadrillen bajadako sari nagusia, umeen saria Mary Poppinsentzat izan zen, sari berezia Nepaleko mendigoizaleek eraman zuten eta Kitto saria Astronautek. Aurtengo txupinazoa Itxaro Mentxaka Bengoetxea mezzosopranoak bota du, zortzi egunetako dantza eta parrandari hasiera emanez.
Atzo giro ederrean ibilita, egun nagusiagaz gozatzeko aukera eduki dute gaur lekeitiarrek. San Antolin Eguneko ohiturei jarraituz, prozesioa egin dute gaur [irailak 2] Lekeitioko alkateak eta zinegotziek udaletxetik elizaraino Lekitto Musika Bandak lagunduta. Elizako kanpaiak entzunda irten dira ibilbidea egitera Lea-Artibai eskualdeko beste alkate batzuekin lagunduta. Herriko bandera eraman dute aurrean, eta aurten, gainera, alkatearen makilagagaz gain, lehenako ohitura berreskuratuz palma-adar bat eraman dute prozesioan; Amaia Antxustegi Ziarda zinegotziak eraman du eskuetan.
Astronautak kuadrillen bajadan parte hartzen. Argazkia: Lekeitioko Udala
Elizako koruak abestutako nagusiaren ostean, Lekitto Musika Bandaren kontzertua egon da plazan, Urtzi Iriondo zuzendariaren gidaritzapean. Plaza bete jendek jarraitu du emanaldia.
[SAN ANTOLIN JAIETAKO EGITARAUA]
Tiragome txapelketa. Goizean jokatu da bai eta ere, Aittitta Txiki kultur elkarteak antolatzen duen tiragoma txapelketa. 21. norgehiagoka izan da aurtengoa, eta antolatzaileek azaldu dutenez, Talan jokatzen hasi zenetik etortzen dira parte hartzaile batzuk Lekeitiora jokatzera. Hiru txapelketa jokatu dira gaurkoan: Gazteena, Lea-Artibai mailakoa eta Mundu mailakoa.
Tiragoma txapelketako irabazleak.
Gazteak izan dira abilezia erakusten lehenengoak. Gazte mailan Martzel Garamendi eta Peru Muiñiz ailegatu dira finalera, eta azkenean txapela Garamendirentzat izan da. Lea-Artibaiko txapela Ondarroara joan da. Tomas Serrano izan da irabazlea. Serrano eta Jose Migel Meabe lekeitiarra igaro dira finalera 8 metroko distantzia igarota eta 9 metroko distantzian huts egin du Meabek bigarren postuan geratuz. Hirugarren, berriz, Javier Bilbao geratu da.
87 urte dituen Aparicio Iglesiasen parte hartzeagaz hasi da Munduko Txapelketa. Guztira hogei tiratzailek parte hartu dute 8 metroko distantziatik hasita eta 12 igaro dira aurrera. 10 metroko distantzian saiatu dira ondoren, eta seik lortu dute jarraitzea. Epaileek hala erabakita 10 metroko distantziatik jaurtitzen jarraitu dute, baina bonbilak txikitzen joan dira. Bost sailkatu dira lehenengo eta horietatik bi pasatu dira finalera Eneko Markaida eta Jesus Cabezas. Azkenean, Larrauriko Eneko Markaida izan da munduko txapelduna, Trapagako Jesus Cabezas bigarrena eta Mungiako Jesus Iturregi hirugarrena.
