Amaia Aberasturi bizkaitarra da artista. Erakusketa irailaren 15era arte dago ikusgai, astegunetan 18:00etatik 20:00etara eta zapatu-domeketan 12:00etatik 14:00etara.
Amaia Aberasturi, Zabielen ikusgai ipini duen erakusketan. Argazkia: Amaia Aberasturi. Arte Ederrak eta Administrazioa eta Finantzak ikasi zituen Amaia Aberasturi Mutrikuko bizilagun bizkaitarrak. Lanbidez administraria izan da betidanik, baina arte mundua gustuko du, eta bere denbora librea arteari eskaintzen dio. Orain, erakusketa bitxia bezain ikusgarria zabaldu du Mutrikuko Zabiel kultur etxean. Erakusketa irailaren 15era arte dago ikusgai, ondoko ordutegian: astegunetan 18:00etatik 20:00etara eta zapatu-domeketan 12:00etatik 14:00etara.
Artelanak eurak ikusgarriak eta koloretsuak badira ere, are harrigarriagoa da materiala nondik lortu duen jakitea. Izan ere, neguan Mutrikuko flysch inguruan pilatutako egur hondakinak batzen ibili da. Batzen eta gordetzen. “Garajea daukat, eta han joan naiz dena pilatzen”. Batutako materialagaz, probak egiten hasi eta sekulako artelanak egin ditu. “Egurrari forma ematen, hasieran aingurak egiten hasi nintzen. Hogei aingura inguru egurragaz egin nituen, eta beste dozena bat beste teknika eta material bat erabilita”.
Kostaldean batutako egur horietatik abiatuta, bada, askotariko lanak egin ditu. “Goizez egiten dut lan, eta arratsaldean zer edo zer egin nahi nuela eta, hasiera baten zesta-puntan aritzeko zestak egiten hasi nintzen. Hori bi mutrikuarrek irakatsi zidaten. Gero hasi nintzen egurra batzen eta erakusketan ikusgai dauden piezak sortzen”.
Erakusketa Mutrikun zabaldu duenez, herriari eta herritarrei ere keinu berezia egin nahi izan die. Hala, Mutrikuko portuan dauden eta herriko ikur diren etxolak ere erakusketara eraman ditu. “Kartoia erabilita, etxola horiek egin ditut, eta ikusgai jarri”.
Sormena bor-borka daukan horietakoa da Aberasturi. Eta ez da lehen aldia erakusketa bat zabaltzen duena. Bai aldiz horrelako artelanen erakusketa egiten duena. “Orain arte 20 bat erakusketa edo egin izan ditut, denak Bizkaian eta bat Iruñean. Horietan, baina, nik egindako koadroak jartzen nituen ikusgai. Hau bestelakoa izan da”.
Oro har, pozik dago Zabielen ikusgai jarri dituen piezekin. “Argazkietan ez da ondo antzematen, baina erakusketa koloretsua da, oso. Adin guztietako herritarrek bisitatu eta ikustekoa da”. Pieza horien artean, bihotz formako obrak ere badaude. “Egun baten, haitzetan egurrak batzen ari nintzela, bihotz forma zeukan kristal zati bat bilatu nuen. Eta hortik sortu zitzaidan bihotz formako piezak sortzeko ideia. Orduan, kristalak batzen ere hasi nintzen”. Bihotzak kristalezkoak ez badira ere, batzuk kristalen bat edo beste ere badaukatela itsatsita dio.
Erakusketa hain da berezia ze, herritar nahikoa ari direla ikusten. Eta ikusteaz gain, erosten ere bai. “10 euro eta 70 euro arteko prezioak ipini dizkiet. Pieza gehienak 10 euro eta 20 euro balio dituzte, eta herritarrak erosten ari dira”. Saltzea, baina, ez da bere helburu nagusia. Denaren gainetik, Aberasturik herritarrek arteagaz gozatzea, kolorez zipriztintzea eta begiak alaitzea nahi du.
