95 lagun batu dira Gerrikaitzeko Andra Mari jaietako herri bazkarian
Mahaiaren bueltan bildu dira munitibartarrak Gerrikaitzeko jaietan egiten duten bazkarian. Musikarekin eta jokoagaz osatu dute eguna.
Munitibartarrak dantzan plazan. Gerrikaitzeko Andre Mari elizaren inguruan batu dira gaur [irailak 7] munitibartarrak jaiak giro onean ospatzeko. Lasai hasi dute ospakizuna, baina egunak aurrera egin ahala giroa berotzen joan da.
Puzgarri, tailer eta jolasek bete dute plaza goizean. Aurpegiak margotu, bitxiak egin, margotu edota jolasean jarduteko aukera eduki dute ume eta gaztetxoek. Bien bitartean, apurka-apurka kuadrillez betetzen joan da elizpea. Hantxe prestatu dituzte herri bazkarirako gutiziak.
Presa barik ibili dira prestaketan. Izan ere, lehen paella txapelketa izaten zuten, baina orain dela urte pare bat, lehiaketa bertan behera utzi eta bakoitzak nahi zuena prestatzea erabaki zuten. Horrela, batzuk marmitakoa eta beste batzuk paellak prestatu dituzte gaurkoan, esate baterako.
Lagun ugari animatu dira herri bazkarian parte hartzera. Guztira, 95 ume, gazte eta helduk bete dute Gerrikaitzeko elizpea. Eta, sabelak beteta, dantzarako bidea hartu dute batzuk, eta jokorako bidea besteak.
Herritarrez gain, inguruko herrietako asko batu dira jokora. Mus eta Briska Txapelketak jokatu dira. 29 bikotek parte hartu dute musean eta 20 bikotek briskan.
Bestalde, Iratzar taldearen erromeriak alaitu du plaza, eta apurka-apurka dantzara ausartu dira bertan bildutakoak. Dantza doinuak goizaldera arte luzatuko dira. Dead Sequoia eta DJ Elepunto egongo dira plazan. Bihar [irailak 8], berriz, Andra Mari eguna ospatuko dute.
EGITARAUA:
- Domeka, irailak 8
- 12:30. Kopaua, plazan.
- 13:00. Dantza emanaldia, plazan.
- 13:30. Gerrikaitzeko harrijasotze txapelketa, plazan. Harrijasotzaileak: Iñigo Jimenez, Inhar Urruzuno, Julio Jimenez, Asier Zubiaga, Julia Martinez eta Karmele Gisasola.
- 17:30. Alaia Martin eta Fredi Paia bertsolariak, plazan.
